It-Tlieta, 7 ta’ Frar 2017. Omelija tal-Papa Franġisku fid-Dar Santa Marta
Ir-raġel, magħmul xbieha t’Alla, hu sid l-art u miegħu għandu l-mara biex iħobbha. Dawn huma t-tliet doni li Alla ta lill-bniedem fil-waqt tal-ħolqien u li fuqhom il-Papa Franġisku bena l-omelija ta’ dalgħodu waqt il-quddiesa fil-kappella tad-Dar Santa Marta.
[youtube https://www.youtube.com/watch?v=AiS_FFzJBJI&w=560&h=315%5D
‘Mulej, x’inhu l-bniedem biex tiftakar fih? Iva, int għamiltu ftit anqas mill-allat u żejjintu bil-glorja u l-unur.’ Il-Papa bena r-riflessjoni tiegħu fuq is-silta mis-Salm 8 u mir-rakkont meħud mill-Ktieb tal-Ġenesi, li nsibu fil-liturġija tal-lum, li juru t-tenerezza, l-imħabba t’Alla fil-ħolqien, meta lill-bniedem Alla tah kollox.
Franġisku saħaq li tlieta huma r-rigali: ibda mill-identità. Qabel kollox, osserva l-Papa, Alla tana d-‘DNA’, jiġifieri għamilna wlied, ħalaqna xbieha tiegħu, bħalu. Meta xi ħadd jiġġenera iben ma jistax jerġa’ lura mill-azzjoni: l-iben ikun sar, hemm jibqa’.
U jekk l-iben ikun jixbah lill-missier fil-ħafna u wkoll fil-ftit, dejjem jibqa’ iben għax ikun irċieva l-identità. Jekk l-iben isir tajjeb, il-missier ikun kburi bih. Jekk ikun xi ftit ikrah, missieru jgħid li hu sabiħ, għax il-missier dejjem hekk magħmul. Dejjem. U jekk l-iben ikun ħażin, il-missier jiskużah, jibqa’ jistennieh…
Ġesù għallimna kif missier jistenna lil uliedu. Tana din l-identità ta’ wlied: raġel u mara, imma rridu nżidu wkoll l-ulied. Aħna qiesna ‘allat’ għax aħna wlied Alla.
It-tieni don ta’ Alla fil-ħolqien hu dmir, skont il-Papa: tana l-art kollha biex naħkmuha kif naqraw fil-Ġenesi. Għalhekk din hi regalità, lill-bniedem Alla għamlu ‘re’, għax ma jridux ilsir, imma ‘re’ bi dmir.
Kif ħadem Alla waqt il-ħolqien, Hu tana wkoll biċċa xogħol x’nagħmlu: li mmexxu ‘l quddiem dak li ħalaq Hu. Mhux li neqirduh, imma nkabbruh, nieħdu ħsiebu, inħarsuh u mmexxuh ‘il quddiem.
Tana kollox, issokta l-Papa, imma jien naħseb: kollox imma mhux il-flus. Għandna kollox imma l-flus min tahomlna? Ma nafx, qal Franġisku, li żied: in-nanniet jgħidulna li x-xitan jidħol minn ġol-but…. naħsbu ftit lil min seta’ ta l-flus…..
Alla ta lill-bniedem il-Ħolqien kollu biex iħarsu u jmexxih ‘il quddiem: dan hu r-rigal. U fl-aħħar Alla ħalaq lill-bniedem xbieha tiegħu, raġel u mara ħalaqhom.
Wara d-dominazzjoni fuq il-Ħolqien, hawn hu t-tielet don: l-imħabba, ibda minn dik li tgħaqqad flimkien lir-raġel u l-mara. Raġel u mara ħalaqhom. Mhux sew li r-raġel jibqa’ waħdu. U għamillu s-sieħba, spjega l-Papa. Alla-mħabba għalhekk jagħti l-imħabba lill-bniedem, itih ‘djalogu ta’ mħabba’ u nimmaġina, issokta jgħid, li l-ewwel djalogu kien wieħed ta’ mħabba.
Niżżu ħajr lill-Mulej, temm il-Papa, għal dawn it-tliet rigali: l-identità, id-don/dmir, u l-imħabba. Nitolbu l-grazzja li nħarsu din l-identità ta’ wlied, li naħdmu għal dan id-don li tana biex immexxuh ‘il quddiem bl-impenn, u l-grazzja li nitgħallmu nħobbu aktar kull jum li jgħaddi.
Ħajr lill-Kamra tal-Aħbarijiet ta’ Radju Marija.