It-Tnejn 6 ta’ Frar 2017. Omelija tal-Papa Franġisku fid-Dar Santa Marta.
Min hu riġidu jibża’ mil-libertà li jtina Alla, jibża’ mill-imħabba, afferma l-Papa Franġisku waqt l-omelija li għamel dalgħodu fil-kappella tad-Dar Santa Marta. In-Nisrani hu lsir tal-imħabba mhux tad-dmirijiet. Għalhekk in-Nisrani m’għandux jinħeba fir-riġidità tal-Kmandamenti.
[youtube https://www.youtube.com/watch?v=TJ0iwevA8dE&w=560&h=315%5D
Int kbir Mulej: Il-Papa kien imnebbaħ mis-Salm 103, salm ta’ tifħir lil Alla għall-għeġubijiet tiegħu.
Il-Missier, osserva l-Papa, jaħdem biex jagħmel dawn l-għeġubijiet tal-ħolqien u biex iġeddidhom permezz ta’ Ibnu.
Darba, qal il-Papa Franġisku, lil tifel staqsieh x’kien jagħmel Alla qabel ma ħalaq id-dinja. It-tweġiba tat-tfajjel kienet: ‘kien iħobb.’
Allura għaliex ħalaq id-dinja Alla? Sempliċement biex jaqsam magħna l-milja tiegħu u biex jagħmel ħolqien ġdid. Bagħat lil Ibnu biex iqiegħed kollox f’postu, biex l-ikrah jagħmlu sabiħ, l-iżball jibdlu f’verità u l-ħażin jibdlu f’tajjeb.
Meta Ġesù jgħid – issokta l-Papa – ‘Il-Missier jaħdem dejjem u jien ukoll,’ l-imgħallmin tal-liġi jiskandalizzaw ruħhom u riedu joqtluH. Għaliex? Għax ma kinux jafu jilqgħu l-affarijiet bħala rigal mingħand Alla, moħħhom kien biss fil-ġustizzja: Dawn huma l-Kmandamenti imma huma ftit, allura nżidu aktar.
U minflok ma fetħu qlubhom għad-don, inħbew, fittxew kenn fir-riġidità tal-Kmandamenti li huma kienu żiedu għal aktar minn 500.
Ma kinux jafu jilqgħu d-don ta’ Alla għax dan jintlaqa’ biss bil-libertà. Dawn kienu nies riġidi li jibżgħu mil-libertà li jtina Alla: kienu jibżgħu mill-imħabba.
Kien għalhekk, żied jgħid, li llum faħħarna lill-Missier u għidnielu: Inti kbir, Mulej, inħobbok ħafna għax tajtni dar-rigal. Salvajtni, ħlaqtni.
Din hi talba ta’ tifħir, talba ta’ ferħ, talba li sseddaq l-allegrija tal-ħajja nisranija. Mhix talba magħluqa, imnikkta, ta’ persuna li ma taf qatt tirċievi d-don ta’ Alla għax tibża’ mil-libertà li magħha ġġib dejjem ir-rigal.
Meta inti ssir ilsir tal-imħabba, inti ħieles. Skjavitù sabiħa din, ikkummenta Franġisku. Imma dawn id-dutturi tal-liġi dan ma kinux jifhmuh.
Dawn huma ż-żewġ għeġubijiet tal-Mulej, issokta l-Papa: il-meravilja tal-ħolqien u l-meravilja tar-redenzjoni. Allura jien kif qed nirċevih dan id-don tal-ħajja, bħala rigal? U jekk qed nirċevih bħala rigal, jien inħobbu l-ħolqien?, inħares kull ma hu maħluq?
Kif qed nirċievi r-redenzjoni, il-maħfra li Alla tani, li għamilni iben flimkien ma’
Ibnu, bl-imħabba, bit-tenerezza, bil-libertà? Jew qed ninħeba fir-riġidità tal-Kmandamenti, ir-riġidità li qatt ma ttik ferħ għax ma tħallikx ħieles?
Kull wieħed u waħda minna jista’ jistaqsi lilu nnifsu kif qed jgħix dawn iż-żewġ għeġubijiet: l-ewwel ħolqien u l-ħolqien ġdid.
Jalla l-Mulej jgħinna nifhmu dan l-għaġeb u jgħinna nifhmu dak li kien jagħmel Hu qabel il-ħolqien tad-dinja: iħobb! Jalla jgħinna nifhmu mħabbtu lejna biex inkunu nistgħu ngħidu bħalma għidna llum: Int kbir wisq, Mulej. Grazzi, grazzi, temm jgħid il-Papa Franġisku.
Ħajr lill-Kamra tal-Aħbarijiet ta’ Radju Marija.