“F’partijiet kbar tad-dinja l-fidi għaddejja mill-periklu li tintefa bħal fjamma li qed jispiċċalha il-fjuwil. Qegħdin niffaċċjaw kriżi profonda ta’ fidi u telfien tas-sens reliġjuż, u dan huwa l-akbar sfida għall-Knisja llum.

“Għalhekk it-tiġdid tal-fidi irid ikun il-prijorità fl-impenn tal-Knisja kollha fi żminijietna.  Nittama li s-Sena tal-Fidi, bil-kollaborazzjoni mill-qalb ta’ dawk kollha li jiffurmaw il-Poplu ta’ Alla,  tkun tista’ tikkontribwixxi biex terġa tagħmel lil Alla preżenti mill-ġdid f’din id-dinja u biex tiftaħ għall-bnedmin l-aċċess għall-fidi u għall-fiduċja f’dak Alla li ħabbna sa l-aħħar, f’Ġesù Kristu msallab u rxoxt.”

Minn diskors li l-Papa Benedittu XVI għamel lill-parteċipanti fil-laqgħa plenarja tal-Kongregazzjoni għad-Duttrina tal-Fidi.  Ġimgħa 27 ta’ Jannar 2012.

Taħseb li bħala nisrani/ja, inti tista’ tagħmel xi ħaġa biex din il-fjamma tal-fidi ma tintefiex?

• Fil-familja tiegħek…
• Fuq il-post tax-xogħol…
• Fil-ħanut mnejn tixtri…
• Mal-ġirien u mal-ħbieb…
• Fil-parroċċa jew fl-għaqda li tattendi…
• Fil-Knisja, mhux biss dik tal-ġebel, imma wkoll dik ħajja…

Iktbilna …>

Is-sena li għadna kif bdejna, ilha fuq fomm bosta, l-aktar fil-mezzi tal-media sa minn bosta xhur ilu. Kien hemm min interpreta kitbiet antiki biex wasal għall-konklużjoni li tmiem id-dinja hu fil-qrib, eżattament fil-21 ta’ Diċembru 2012.  Oħrajn ma qablux u insistew li l-istess kitbiet ma jħabbrux it-tmiem, imma propju il-bidu ta’ żmien ġdid.

Personalment naħseb li lil bosta persuni, il-logħob bin-numri jimmeraviljhom.  Forsi għaliex fin-numri ta’ din id-data, 20.12.2012,  jilmħu ċertu faxxinu, allura ħasbu li bilfors irid ikun fihom tifsira speċjali, xi kataklażmu straordinarja jew it-twelid ta’ era ġdida. Minn jaf x’għad iridu jivvintaw għad-data 21.12.2112.  Imma sa dakinhar ħafna minna ma jkunux hawn.

Dan kollu, lil uħud iffakkarhom f’dak li suppost kellu jseħħ fil-bidu tas-sena 2000. Imbagħad qalulna li mhux fil-bidu tagħha, imma fi tmiemha.  Għal dawk li bħali għandhom ċerta età, jfakkarhom ukoll fit-tliet ijiem tad-dlam, li kellu jkollna fl-1960.

L-2012 u Vatikan II

Imma waqt li bosta huma mitlufa f’qari u previżjonijiet appokalittiċi, għall-Knisja Kattolika wkoll, is-sena 2012 hija waħda importanti u bi ġrajjiet li ma nistgħux inħalluhom għaddejja, lanqas f’pajjiżna.

Per eżempju, f’din is-sena ma nistgħux ma nfakkrux il-ħamsin anniversarju mill-ftuħ tal-Konċilju Vatikan II li seħħ fil-11 ta’ Ottubru 1962. Kien l-akbar avveniment tal-Knisja fis-seklu għoxrin.  Ma nemminx li għandna nfakkruh b’ċerimonji u ċelebrazzjonijiet għax minn dawn spiss ikollna ħafna.  Aktar għandna nfakkru l-wirt kbir li ħallilna fid-dokumenti tiegħu. Huma dokumenti li bosta minna nsewhom. Oħrajn għadhom ma skoprewhom qatt.  Huma dokumenti li minkejja li għaddew kważi ħamsin sena minn fuqhom, iżda għadhom tant attwali anke għal żmienna.

Imma dwar il-Konċilju, minbarra l-kitbiet, irridu nfakkru b’mod speċjali l-ispirtu tiegħu.  Spirtu ta’ konverżjoni interna u tiġdid.  Spirtu ta’ tama u ħeġġa. Spirtu ta’ ottimiżmu u qawmien karatterizzati fit-tbissima ta’ Ġwanni XXIII u fl-għajta tiegħu, “aggiornamento”.

Sinodu dwar l-Evanġelizzazzjoni Ġdida.

Avveniment importanti li se jseħħ fil-Knisja matul l-2012 huwa s-Sinodu tal-Isqfijet dwar l-Evanġelizzazzjoni Ġdida.  Żgur mhux b’kumbinazzjoni li anke dan se jiftaħ fil-11 ta’ Ottubru.   Fih se tkun rappreżentata wkoll il-Konferenza Episkopali Maltija.

Se jkunu laqgħat ta’ importanza kbira għall-Knisja kollha għaliex fihom l-isqfijiet iridu jfasslu pjan serju għat-triq li l-Knisja trid timxi minnha f’dan is-seklu.  Sintendi, it-triq tal-Knisja hija Kristu u l-evanġelju tiegħu.  Dwar dan ma hemm ebda dubju għax dan il-kliem qalu Ġesù nnifsu. (Ġw 14:7).    Imma l-Knisja għandha dikjarazzjoni ċara u qawwija oħra dwar it-triq tagħha. Għamilha il-Papa Ġwanni Pawlu II.  “Il-bniedem hu bħal triq prinċipali li l-Knisja trid tgħaddi minnha biex taqdi l-missjoni tagħha: huwa l-ewwel triq u t-triq ewlenija għall-Knisja.” (Redemptor Hominis 14)

Ċert li f’dawn iż-żewġ dikjarzzjonijiet kbar, dik ta’ Kristu u dik tal-Papa Ġwanni Pawlu II ma hemm ebda kontradizzjoni.  Iżda bla dubju ta’ xejn joffru sfida enormi għalina lkoll li flimkien illum niffurmaw il-Knisja ta’ Kristu.  Kif tista’ l-Knisja fi żmienna timxi fl-istess waqt minn dawn iż-żewġ toroq li fil-verità huma biss triq waħda?

Is-Sena tal-Fidi.

Fil-11 ta’ Ottubru 2012 se tibda wkoll dik li hi dikjarata mill-Papa preżenti bħala, “Is-Sena tal-Fidi”. Benedittu XVI qal li din trid tkun opportunità li tgħin il-Knisja  biex  tagħmel żmien ta’ riflessjoni  u tiskopri mill-ġdid il-fidi. (Porta Fidei 4) Ġejja mill-Papa nnifsu, dikjarzzjoni bħal din tista’ tħasseb lil uħud. Għaliex il-Papa jgħid li l-Knisja trid tiskopri mill-ġdid il-fidi?  Forsi dan ifisser li l-Knisja tilfet il-fidi?

Mhux skop tagħna f’din il-kitba qasira li nagħtu tweġibiet imma li nressqu domandi.  Mistoqsijiet li huma wkoll jistgħu jgħinnu biex issir riflessjoni, kemm fija bħala nisrani, kemm fina bħala komunità.

L-għodda f’idejn il-Knisja huma bosta.  Il-Kelma ta’ Alla hija dubju ta’ xejn fost l-aktar importanti.  Magħha hemm ukoll is-Sagramenti, b’mod speċjali dak tal-Ewkaristija. Għandna wkoll minjiera kbira ta’ dokumenti, kitbiet u diskorsi mill-Knisja stess.  Il-Papa jisħaq b’mod partikolari dwar il-Katekiżmu.

Intlifna fit-Tempju?

Meta kellu tnax-il sena, it-tfajjel Ġesù kien intilef fit-tempju.  Jekk nimxu mal-kalendarju Gregorjan, allura dan seħħ eżattament elfejn sena ilu. Imma lanqas dan l-anniversarju m’għandu jkun okkazzjoni oħra biex niċċelebraw iżda biex nirriflettu.

Dakinhar, fi kliem it-tfajjel Ġesù kienet ir-rieda tal-Missier stess li huwa jkun f’dak li hu ta’ Missieru.  Iżda kif għaddew it-tliet ijiem, Ġesù mar lura ma’ niesu lejn ir-raħal tiegħu fejn baqa’ jikber fl-għerf, fis-snin u fil-grazzja, quddiem Alla u quddiem il-bnedmin. (San Luqa 2:52)

Kultant nistaqsi lili nnifsi, jista’ jkun li llum aħna wkoll intlifna fit-tempju?  Mhux għal tliet ijiem, imma għal tliet sekli. Forsi aktar ukoll. Mhux neċessarjament għax din għalina din kienet ir-rieda tal-Missier, imma għax forsi kien aktar komdu li nibqgħu hemm ġew?

Domandi għalik biex twieġeb.

U issa xtaqt ukoll nistaqsi lilek li qed taqra…

Ma taħsibx, inti wkoll, li llum wasal il-waqt li nilqgħu l-isfida u noħorġu ‘l barra mill-knejjes, mis-sagristiji u mill-għaqdiet u naqdfu ‘l barra fil-fond?

Ma taħsibx li mill-wirt tal-Konċilju Vatikan II skoprejna ftit wisq, għax it-testment tiegħu għadna ma ftaħnihx?

Forsi mhux minnu li minkejja l-ħafna diskorsi dwar Evanġelizzazzjoni Ġdida, din il-frażi llum saret biss clichè għax la nafu xi tfisser u lanqas kif se nibdew nwettquha?

Kif se nibdew issa stess inħejju lilna nfusna bis-serjetà biex meta ftit xhur oħra tasal fuqna s-Sena tal-Fidi, din ma tibqgħax għaddejja bla ma nintebħu biha?

Napprezzaw ħafna l-kummenti u s-suġġerimenti tiegħek.

Meta nitkellmu jew nisemgħu oħrajn jitkellmu dwar dan is-suġġett spiss nintebħu li aktarx ma nagħmlux differenza bejn “twemmin” u “fidi”; dak li bl-Ingliż insejħulhom “belief and faith”.

Jista’ jkun …

• li meta nużaw il-kelma “fidi” aktarx inkunu rridu nfissru “twemmin”?
• li b’fidi spiss nifhmu dik il-lista ta’ dawk il-veritajiet li li tgħallimna fil-klassijiet tar-reliġjon?
• li t-twemmin tagħna huwa biss att intelletwali u xejn aktar minn hekk?
• li f’dan is-sens it-twemmin jista’ jwassal jew forsi ġieli wassal għal ideoloġiji li jkunu wkoll il-kawża ta’ firda, ġlied u gwerrer.

Mill-banda l-oħra, fid-dokument Porta Fidei il-Papa Benedittu XVI jitkellem dwar …

• il-ferħ tal-fidi u l-entużjażmu biex wieħed jikkomunikha lill-oħrajn;
• fidi li tikber meta ngħixuha bħala esperjenza ta’ l-imħabba li rċevejna u meta nikkomunikawha bħala esperjenza ta’ grazzja u ferħ;
• fidi li twassalna biex nagħtu l-frott, għax twessa` ‘l qalbna bit-tama u tagħmilna kapaċi nagħtu xhieda li tagħti l-ħajja;
• fidi li tiftaħ il-qalb u l-moħħ ta’ dawk li jisimgħu u jwieġbu għal-istedina tal-Mulej biex jisimgħu kelmtu u jsiru dixxipli tiegħu.

Madankollu il-Papa jitkellem ukoll dwar l-importanza tat-twemmin u l-verità tal-fidi u jgħid li l-fidi tikber u tissaħħaħ biss billi nemmnu. Jikteb li ma hemmx possibiltà oħra biex inkunu ċerti għajr dik li nintelqu dejjem aktar f’idejn l-imħabba li l-għajn tagħha hu Alla.

U inti x’taħseb li huwa meħtieġ fil-Knisja f’Malta biex it-twemmin tagħna jimmatura f’fidi vera?

X’hemm bżonn biex minflok jiddeġenera f’ideoloġija, it-twemmin ikun dak li jwassal li min jemmen f’relazzjoni, mhux ma’ sett ta’ veritajiet imma mal-persuna ta’ Ġesù Kristu?

Wara kollox il-fidi tiegħna mhix f’lista ta’ dommi imma fil-persuna ta’ dak li fih nilmħu l-istess Alla.

Iktbilna.  Napprezzaw ħafna l-kummenti tiegħek.

waqt xandira lill-poplu taċ-Ċekoslovakkja

fil-ħatra tiegħu bħala President

1 ta’ Jannar 1990

(Tradott għall-Maltin minn Dun Hector Scerri)

Aħna ngħixu f’ambjent morali kontaminat. Aħna mradna moralment għaliex drajna nitkellmu b’manjiera differenti mill-mod kif konna naħsbu. Drajna ma nemmnu f’xejn, drajna ninjuraw lil xulxin, drajna nagħtu każ tagħna nfusna biss. Kunċetti bħall-imħabba, il-ħbiberija, il-kompassjoni, l-umilta’ u l-maħfra tilfu l-profondita’ tagħhom u d-dimensjonijiet tagħhom, u għal ħafna minna kienu jew saru jirrapreżentaw biss stramberiji psikoloġiċi, jew kienu jixbħu tislimiet antiki li tlifna. Kienu saru xi ftit ridikoli fi żmien tal-kompjuters u tal-vetturi spazjali.

Ftit biss minna kienu kapaċi jgħajtu b’vuċi għolja li l-ħakkiema ta’ dak iż-żmien ma kellhomx ikunu ta’ setgħa bla tarf, u li rziezet speċjali li kienu jipproduċu ikel ekoloġikament pur u tal-aqwa kwalita’ għalihom biss kellhom jibagħtu minnu lill-iskejjel, djar tat-tfal u sptarijiet, kemm-il darba l-agrikultura tagħna ma kenitx kapaċi tagħtihom lil kulħadd. Ir-reġim ta’ qabel – armat b’ideoloġija arroganti u intolleranti – ċekken il-bniedem għal forza ta’ produzzjoni u n-natura għal għodda ta’ produzzjoni. B’dan il-mod hija attakkat kemm ir-relazzjoni bejn il-bniedem u n-natura, kif ukoll dak li hemm fil-qalba tagħhom. L-ideoloġija ċċekken bnedmin imżejna b’tant doni u awtonomi li kienu kapaċi jaħdmu b’sengħa kbira f’pajjiżhom u tagħmel minnhom skorfini u boltijiet ta’ magna mostrożament kbira, kollha ħsejjes u tinten, u li t-tifsira tagħha ma kienet ċara għal ħadd. Din il-magna ma setgħet tagħmel xejn jekk mhux li bil-mod il-nod u inevitabilment, teqred kemm lilha nfisha kif ukoll l-iskorfini u l-boltijiet kollha tagħha.

Meta nitkellem dwar ambjent morali kontaminat, m’inix nitkellem biss dwar “sinjuri” li jieklu ħxejjex organiċi, u li ma jħarsux minn tieqa ta’ ajruplan. Qed nitkellem dwarna lkoll. Konna lkoll drajna s-sistema totalitarja, u aċċettajnieha bħala stat ta’ fatt li ma setax jinbidel, u għalhekk għenna biex nipperpetwawha. Fi kliem ieħor, aħna lkoll konna – għalkemm, naturalment, mhux kulħadd bl-istess mod – responsabbli  għall-operat tal-magna totalitarja; ħadd minna ma huwa biss il-vittma tagħha; konna lkoll kompliċi fiha (we are all its co-creators).

Għalfejn qiegħed ngħid dan? Ma jagħmel l-ebda sens li nifhmu l-wirt ikrah tal-aħħar erbgħin sena bħala xi ħaġa barra minna, bħala xi ħaġa li qarib imbiegħed tagħna ħallielna fit-testment tiegħu. Għall-kuntrarju, għandna nilqgħu dan il-wirt bħala dnub li aħna kkommettejna kontra tagħna stess. Jekk naċċettawh b’dan il-mod, nibdew nifhmu li jiddependi minna lkoll, u jiddependi biss minna li nagħmlu xi ħaġa dwaru. M’għandniex inwaħħlu għal kollox fil-mexxejja ta’ qabel, mhux biss għax ma jkunx minnu, imma wkoll għax jista’ jiġri li nonqsu mid-dmir li kull wieħed minna qed jaffaċċja llum, jiġifieri l-obbligu li għandna li naġixxu b’mod independenti, b’liberta’, skont ir-raġuni u malajr. Ejjew ma niżbaljawx: l-aħjar gvern fid-dinja, l-aħjar Parlament u l-aħjar President, jiksbu biss ftit waħedhom. U jkun żball li nistennew minnhom biss rimedju ġenerali. Il-liberta’ u d-demokrazija jinkludu il-parteċipazzjoni, u għalhekk, ir-responsabilta’ tagħna lkoll. … Jekk nagħmlu dan, it-tama terġa’ titwieled fi qlubna.

… Biex nagħlaq, irrid ngħid li rrid inkun President li jitkellem anqas u jaħdem aktar. Li nkun President li ma jħarisx biss mit-tieqa tal-ajruplan, imma li, qabel kollox, ikun preżenti fost ħutu ċ-ċittadini u jismagħhom sewwa.

Għandkom mnejn tistaqsu x’tip ta’ repubblika qed noħlom dwarha. Ħalluni nwieġeb: jien noħlom repubblika independenti, ħielsa u demokratika, repubblika ekonomikament ‘il quddiem u fl-istess ħin soċjalment ġusta, fi ftit kliem, repubblika umana li taqdi l-individwu, u li għalhekk tittama li l-individwu jaqdi lilha wkoll. Noħlom repubblika ta’ persuni bilanċjati, għax jekk mhux hekk ikun impossibli li ssolvi l-problemi tagħna, umani, ekonomiċi, ekoloġiċi jew politiċi.

L-aktar wieħed distint fost il-predeċessuri tiegħi kien beda l-ewwel diskors tiegħu b’silta mill-edukatur kbir Ċek, Comenius. Ippermettuli li nagħlaq dan l-ewwel diskors tiegħi permezz ta’ parafrażi ta’ kliemu: Poplu, il-Gvern tagħkom reġa’ lura għandkom!

L-Avvent huwa iktar minn tellieqa għall-Milied

L-Avvent huwa l-bidu tas-sena liturġika tal-Knisja, u huwa iż-żmien speċifiku fejn aħna niġu msejjħa biex nippreparaw lilna nfusna għall-miġja ta’ Kristu, Emmanuel, Alla magħna. Fil-qari tal-Quddiesa, nisimgħu lil Ġwanni l-għammiedi jsejħilna ‘Ħejju t-triq tal-Mulej!’ Iżda meta naħsbu ftit kemm ikollna x’nagħmlu f’dan iż-żmien tal-Avvent u fiż-żmien ta’ Diċembru, li nippreparaw ruħna spiritwalment jidher li jintilef xi daqxejn. L-iktar f’din is-sena li l-ewwel Ħadd tal-Avvent se jiġi fl-aħħar Ħadd ta’ Novembru fejn il-ġirja tax-xiri jkun diġà beda mhux ħażin.

Ejjew nippruvaw insibu ftit ħin tal-kwiet din il-Ħarifa u naħsbu ftit fuq il-prioritajiet spiritwali tagħna. Forsi mingħajr ma nafu inkunu mejtin għal ftit mumenti ta’ skiet u ġabra jew nixtiequ li dan l-Avvent u l-Milied ma jkunux daqshekk ikkummerċjalizzati. Forsi tixtieq tgħażel iktar mumenti qaddisa fil-parroċċa tiegħek u tattendihom aktar b’devozzjoni. Aħseb ftit int x’tista’ tgħamel flimkien mal-familja tiegħek dan l-Avvent, għamlu lista ta’ kif tixtiequ tippreparaw ruħkom għal dan iż-żmien hekk qaddis u attwawha.

Araw x’hemm bżonn fil-parroċċa tagħkom, tkellmu mal-Kappillan u għidulu l-ħsieb tagħkom. Fittxu xi istituzzjoni u araw x’għandha bżonn. Araw ukoll fit-triq tagħkom hemmx xi ħadd li għandu bżonn l-għajnuna. Imqar tmorru tixtrulu jew teħdulu xi naqra brodu sħuna, jew titkellmu miegħu. Araw fil-familja tagħkom, min għandu bżonn ta’ kelma ta’ faraġ jew inkoraġiment. Kunu lesti li tisimgħu. Kunu preżenti. F’dan iż-żmien itolbu aktar kemm waħedkom kif ukoll flimkien. Huwa mument ta’ stennija, huwa mument prezzjuż biex nirranġaw id-differenzi ta’ bejnietna, biex naħfru, biex nirringrazzjaw u nkunu grati lejn Alla u lejn ħadd ieħor. Tagħmlux kollox f’daqqa imma għażlu x’tixtiequ tgħamlu imqar waħda jew tnejn minn dawn l-affarijiet imma agħmluhom sewwa.

Xi kultant jgħamuna bil-ħsieb li kollox irid isir qabel il-25 ta’ Diċembru. Bħala kattoliċi, aħna għandna iktar minn ġurnata waħda biex niċċelebraw il-Milied – għandna l-mument liturġiku kollu fejn nistgħu niċċelebraw! X’jimporta jekk tasal kartolina tard, jew nagħmlu xi tisjira speċjali f’xi ġurnata oħra, jew nagħmlu xi ftit gallettini lil xi anzjani f’xi mument ieħor. Ejjew ma nillimitawx ruħna għall-mument sfrenat tal-Milied biss. Din is-sena ieqaf u ggosta dawn il-mumenti speċjali u strieħ ukoll. Il-Mulej irid jitwieled f’qalbek u fil-familja tiegħek!

Parir żgħir

Ħafna minna daqt nibdew nżejnu d-djar tagħna. Din is-sena agħmlu l-girlanda (kuruna) tal-Milied l-ewwel priorita, fuq il-mejda ta’ l-ikel tagħkom, fejn tiltaqgħa l-familja kollha biex tiekol. Tkellmu fuqha u waqt l-ikel ixegħluha skond iż-żmien, din tgħinna nirriflettu iktar fuq il-miġja ta’ Kristu. Tgħinna nieqfu u naħsbu fuq minhu veru d-dawl tad-dinja. Dan l-att sempliċi jgħin lit-tfal jifhmu xi jsir fil-quddiesa u naħsbu fuq is-sejħa li Kristu qiegħed jagħmlilna tul ħajjitna.

Maqluba għall-Malti minn

Anna Maria Fenech

Huwa suġġett ferm interessanti imma xi kultant skabruż. Fl-istess ħin huwa importanti ħafna biex ngħinu lill-uliedna jifhmu ftit aħjar min hu dan Alla inviżibbli li ħalaq l-univers u li huwa l-ikbar ħabib tal-umanità. Il-Knisja Kattolika tgħallem li l-ġenituri huma l-ewwel u l-iktar għalliema importanti għall-uliedhom (ara l-Katekiżmu tal-Knisja Kattolika, nu. 2225). Bħala ġenituri, huwa importanti ħafna li l-ewwel nikkultivaw relazzjoni tajba ma’ Alla biex nassiguraw ruħna li aħna veru l-aqwa għalliema għall-uliedna biex nintroduċuh lilhom.

Qegħda nagħtikom ftit punti biex jgħinukom tagħmlu dan:

Itolbu regolarment, u aqraw regolarment qari spiritwali. Mhux bħala familja biss, imma anki individwalment. Meta aħna jkollna relazzjoni profonda ma’ Alla, aħna nħossu dik ix-xewqa li naqsmuh, u nwassluh ma’ dawk li nħobbu. Ħallu lill-uliedkom jindunaw (jaqbdukom) taqraw l-iskrittura jew jaqbdukom titolbu minn żmien għal żmien. L-azzjonijiet tagħna għandhom iktar saħħa mill-kliem. It-tfal jemmnu fuq Alla meta jaraw lill-ġenituri jgħarfu lil Alla u jitkellmu miegħu.

Żejjen id-dar tagħkom b’simboli konkreti tal-fidi tagħkom. It-tfal iż-żgħar huma persuni konkreti ħafna. Huma għandhom bżonn sinjali viżibbli tal-preżenza ta’ Alla fid-dar tagħkom. Statwi jew stampi ta’ Ġesù huma importanti ħafna għax Kristu huwa viżibbli u l-iktar revelazzjoni kompleta ta’ Alla għall-umanità. Daħħal dawn l-istatwi jew stampi ta’ Ġesù mat-tfal fil-kmamar tagħhom, din l-immaġini tgħin lit-tfal jifhmu li Alla jħobb it-tfal u jixtieq ikun ħbieb magħhom.

Mat-tfal iżgħar irreferi jew għodd lil Alla bħala membru tal-familja fid-dar tagħkom. Meta uliedek jitgħallmu jagħmlu xi ħaġa ġdida, uruhom li intom kburin bihom u żiedu: “ u taf minhu kburi bik ukoll? Alla huwa kburi bik! Aħna ma nistgħux narawh lil Alla, imma Hu jista’ jarana, u Hu dejjem kuntent bina meta jarana li qed nikbru kif jixtieqna Hu.”

Meta uliedna jibdew jikbru, tibżax u tiddejjaqx tiddiskuti suġġetti difiċli. F’konferenza għall-‘press’ fi żmien il-Ġimgħa Mqaddsa, il-Papa Benedittu XVI ġie mistoqsi minn tifel Ġappuniż għaliex Alla jippermetti s-sofferenzi minnħabba it-tsunami jew terrimoti. Minnflok ma’ wieġeb bi tweġiba frivola, il-Papa qal li kien diffiċli għalih ukoll biex jifhem il-għala, iżda ħaġa waħda huwa żgur li Alla jgħamel lilu nnifsu viċin dawk li jsoffru u jgħinhom. Meta t-tfal u l-pre-adoloxxenti jbatu biex jifhmu ċerti avvenimenti jew ikunu qed jgħaddu minn mumenti diffiċli kun żgur li tisħaq li Alla jkun imdejjaq ukoll u li Hu lest biex jgħinhom f’dawn il-mumenti ta’ tbatija.

Ftakar li bħala ġenitur, inti ikona ta’ Alla għal uliedek. Alla juri lilu nnifsu lilna bħala missier u din ir-relazzjoni tieħu post speċjali f’ħajjitna li tgħinna nitgħallmu aktar fuq Alla. Meta jiġrilna xi ħaġa sabiħa jew naqilgħu xi grazzja, għin lit-tfal jifhmu li Alla huwa kontinwament magħna, imħabbtu għalina hija bla kundizzjoni u li Hu dejjem preżenti fil-ħajja tal-familja tagħna. Huwa importanti li aħna nħalluh jaħdem f’ħajjitna. Ftakru li f’kull għażla li tagħmlu bħala ġenituri staqsu lilkom infuskom, “Minn din is-sitwazzjoni x’se jitgħallmu uliedna fuq Alla, li aħna ngħajjtulu Missier?”

Anna Maria Fenech

Hekk kif il-ġranet ta’ vaganzi jispiċċaw u jibdew il-ġranet ta’ l-iskola, il-ħajja tibda ssir aktar kaotika. Tant ikollna x’nagħmlu li xi kultant l-anqas nindunaw xi jkun qed jgħaddi minngħalina. Nispiċċaw bla nifs u għajjenin.

Kemm-il darba kull filgħodu kif noħorġu għax-xogħol inħossuna qisna sejrin għal gwerra bit-traffiku li nsibu ma’ wiċċna, lesti biex naħtfu lil kull min jiġi quddiemna. Inkunu mimlijin stress qabel ma tibda’ l-ġurnata tax-xogħol jew ta’ l-iskola. U xi ngħidu għal kumplament tal-ġurnata? Meta nħossuna li qisna ‘taxi-drivers’, koki lesti bil-platt sħun f’mumenti differenti tal-ġurnata, min dieħel u min ħiereġ, ħwejjeġ biex jinħasslu u ninkwetaw fuqhom meta se jinxfu l-iktar meta tagħmel xi ġurnata xita, ix-xiri li jrid isir, il-‘home-works’ u mitt ħaġ’oħra Kif nistgħu nieqfu naqra u nikkwietaw f’mumenti tal-ġurnata fil-ħajja tagħna?

Hawnhekk hawn ftit modi kif tista’ tnaqqas il-ġenn u tipprova ddaħħal mumenti ta’ serenità fil-ħajja tal-familja tiegħek:

Tfittixx li tagħmel affarijiet li taf li ma tistax tlaħħaqhom. Per eżempju itlob filgħodu kmieni hekk kif tqum, kun sempliċi fit-talb tiegħek bħal meta tkun qed tkellem ħabib, itlob biex iżżomm kalm u paċenzjuż, itlob għall-għerf, dak l-għerf li Alla biss jista’ jagħtijulek u fuq kollox itlob biex qalbek tkun dejjem miftuħa u mimlija mħabba lejn kulħadd speċjalment lejn dawk li sa tiltaqa’ magħhom matul il-ġurnata.

Ssajjarx tisjir elaborat meta għandek xi ħassla ħwejjeġ kbira jew meta taf li fl-ufffiċċju kellek ħafna x’tagħmel iktar mis-soltu. Għamel lista ħafifa x’tista’ ssajjar matul il-ġimgħa biex int ma tippanikjax jekk jinqala xi ħaġa li ma kontx qed tistenniha. Erfa’ t-tisjir elaborat għal ġranet speċjali jew fil-mumenti li jkunu komdi għalik u għal familja tiegħek.

Għallem lil uliedek jitfu l-mobiles u l-ipods, waqt li tkun qed twassalhom x’imkien biex f’dak il-mument japprezzaw ftit silenzju jew jkun hemm ċans fejn wieħed jaqsam xi kelma flimkien sakemm tasslu. Il-ħajja tista’ tkun mimlija iżda tħalluhiex tifgakom.

Rutina

Ir-rutina tista’ tidher monotona, iżda din tista’ tkun l-aqwa ħabiba tagħkom fid-dar. Sabiħ li xi kultant tkun spontanju u ma tkunx riġidu, iżda r-rutina hemm bżonnha. It-tfal iħobbuha r-rutina, hija tgħinhom li hemm waqtiet fil-ħajja li jridu jiġu rrispettati, ħin ta’ l-ikel, ħin tal-‘homework’, ħin għal quddiesa, ħin għat-talb, ħin għal xogħol fid-dar, ħin għal katekeżi, ħin biex niddevertu flimkien. Nitgħallmu nagħżlu l-prioritajiet għal ħajjitna u hekk tkun iktar faċli għalina biex nieħdu deċiżżjonijiet li jistgħu jinqalgħu matul il-ġurnata. Il-familja tiegħek tirringrazzjak żgur għar-rutina.

Skiet

Dan mhiex faċli fil-familja tiegħi u naħseb f’ħafna familji hija diffiċli biex jinstab is-skiet. Aħna nħobbu nitkellmu ħafna u ġieli jiġri li kulħadd ikun irid jgħid tiegħu. Mhux ħaġa ħażina din, huwa tajjeb li jkun hemm mumenti fejn wieħed jista’ jaqsam dak li jkun għadda mingħalih matul il-ġurnata, huwa tajjeb ferm li wieħed jesprimi dak li jkun qiegħed iħoss u li nisimgħu lil dak li jkun, iżda hemm mumenti oħra fejn ikun tajjeb li jirrenja s-silenzju. Xi kultant, anzi ħafna drabi aħna nibżgħu mis-silenzju. Qisna rridu bil-fors nimlewh bil-kliem. Jekk ma nitkellmux qisna m’aħniex f’postna. Dan m’għandux ikun. Għandna napprezzaw il-mumenti ta’ silenzju. Għamluha logħba mat-tfal bħal pereżempju, min jaf joqgħod ħalqu magħluq l-iktar, u min hu kuraġġuż biżżejjed li jitfi TV jew kompjuter u jinġabar fih innifsu u japprezza l-kwiet ta’ madwaru. Għallmu lit-tfal li dawn huma mumenti prezzjużi fejn fis-skiet jistgħu jgħarfu dawk il-mirakli żgħar li jsiru fil-familja tagħhom kuljum u li bl-istorbju ta’ madwarhom jistgħu jintesew.

Anna Maria Fenech

Minn-Leħen is-Sewwa,  Sibt 22 ta’ Ottubru 2011

Nhar it-Tnejn, 17 ta’ Ottubru, il-Papa Benedittu XVI ippubblika l-Ittra Apostolika Porta fidei (Il-Bieb tal-fidi) li biha istitwixxa s-Sena tal-Fidi li se tibda f’Ottubru 2012 u tintemm fl-24 ta’ Novembru, 2013. F’Ottubru, 2012 se titlaqqa’ l-Assemblea Ġenerali tas-Sinodu tal-Isqfijiet li se tittratta dwar “L-Evanġelizzazzjoni Ġdida fit-trasmissjoni tal-Fidi Nisranija”.

Fid-dokument tiegħu, il-Papa jistqarr li qiegħed jistitwixxi din is-Sena tal-Fidi bi tweġiba għall-kriżi profonda tal-fidi li affettwat lil ħafna nies u ħalliethom ifittxu tweġibiet. “Sa mill-bidu tal-ministeru tiegħi bħala Suċċessur ta’ San Pietru”, kiteb il-Papa, “tkellimt fuq il-bżonn li nerġgħu niskopru l-vjaġġ tal-fidi sabiex iwasslilna b’mod aktar ċar id-dawl fuq il-ferħ u l-entużjażmu   mġedded tal-laqgħa tagħna ma’ Kristu.”

Huwa kompla jispjega li l-“Bieb tal-Fidi” huwa dejjem miftuħ u huwa l-muftieħ biex nidħlu fil-Knisja ta’ Alla. Il-mixja tal-fidi tibqa’ sejra tul il-ħajja kollha, mill-magħmudija sakemm naslu  sal-ħajja ta’ dejjem. Ta’ spiss jiġri li l-Insara jagħtu aktar ħsieb u jimpenjaw ruħhom aktar fir-realtajiet soċjali, kulturali u politiċi minn dawk spiritwali. Huwa għalhekk li fost ħafna nies teżisti kriżi profonda ta’ fidi. Il-bniedem illum għalhekk għandu bżonn jerġa’ jsib il-gost tal-Kelma t’Alla u jisma’ lil Ġesù li jistedinna biex infittxu l-ħobż li jibqa’ għall-ħajja ta’ dejjem.

L-iskop tas-Sena tal-Fidi, spjega l-Papa, huwa dak li toffri lill-Knisja kollha okkażjoni biex fiha nirriflettu u nerġgħu niskopru l-fidi. Din mhix l-ewwel darba li l-Knisja qed tiċċelebra s-Sena tal-Fidi. Dan għaliex il-Knisja dejjem għandha bżonn tiġġedded fil-fidi, issaffiha, tikkonfermaha u tistqarrha.

It-tiġdid fil-Knisja jrid iseħħ permezz tax-xhieda tal-ħajja ta’ dawk li jemmnu għaliex is-sejħa tagħhom hija dik li permezz tagħhom tiddi l-verità tal-Kelma li ħallielna l-Mulej. Barra minn hekk, il-Knisja minkejja li hija qaddisa, għandha fi ħdanha l-midinbin u għalhekk hija għandha bżonn tissaffa u timxi ’l quddiem fit-triq tal-penitenza u tat-tiġdid.

Is-Sena tal-Fidi għalhekk hija stedina għall-konverżjoni awtentika u mġedda fil-Mulej, l-uniku Salvatur tad-dinja. Fil-misteru tal-mewt u l-qawmien tiegħu, Alla wriena l-milja tal-Imħabba li ssalva  u ssejjaħ lill-bnedmin għall-konverżjoni permezz tal-maħfra tad-dnubiet.

Hija l-imħabba ta’ Kristu li timlilna qalbna, kompla l-Papa, u tħeġġiġna biex nevanġelizzaw anki llum u tibgħatna fit-toroq tad-dinja biex inħabbru lil kulħadd il-Vanġelu tiegħu lill-ġnus kollha. Huwa meħtieġ illum niskopru l-ferħ fit-twemmin tagħna u nerġgħu insibu l-entużjażmu biex nikkomunikaw il-fidi. F’din is-Sena tal-Fidi, dawk li jemmnu jridu jiċċelebraw din is-Sena, f’mument ta’ bidla fid-dinja, billi jħeġġu lil dawk li jemmnu fi Kristu biex jissaħħu u jsaħħu l-għaqda tagħhom fil-Vanġelu, jistqarru l-fidi tagħhom fi Kristu Rxoxt fil-Katidral u l-knejjes tad-dinja kollha, fid-djar u l-familji u jittrasmettu l-fidi lill-ġenerazzjonijiet
futuri.

In-nisrani ma jistax jaħseb li l-fidi hija xi ħaġa privata għaliex din titlob minnu responsabbiltà soċjali. Matul din is-Sena, irridu niskopru l-għana tat-tagħlim li l-Knisja laqgħet u ħarset matul elfejn sena ta’ storja. Irridu niltaqgħu ma’ Kristu li jinsab preżenti fil-Knisja, fil-Liturġija u s-Sagramenti. Irridu nintensifikaw ix-xhieda tagħna tal-karità għaliex il-fidi mingħajr karità tkun biss sentiment. Hija l-fidi li ssostnina biex inħarsu bit-tama fl-impenn tagħna fid-dinja waqt li qegħdin nistennew “smewwiet ġodda u dinja ġdida, fejn tgħammar il-ġustizzja.” (Ap. 21, 1).

Il-Papa jtemm il-Motu Proprio bil-kliem: “Aħna nemmnu b’fidi ferma li l-Mulej Ġesù rebaħ il-ħażin u l-mewt. B’din il-fiduċja żgura aħna nafdaw fih. Huwa jinsab preżenti fostna u jirbaħ is-setgħa tal-ħażin (Lq. 11, 20), u l-Knisja, komunità viżibbli tal-ħniena tiegħu, tibqa’ fih bħala sinjal ta’ rikonċiljazzjoni definittiva mal-Missier. Aħna nafdaw dan iż-żmien ta’ grazzja f’Omm Alla,  inħabbra “hienja għaliex emmnet.” (Lq. 1,
45).

Minn-Leħen is-Sewwa, Sibt 22 ta’ Ottubru 2011

Nhar il-Ħadd, 16 ta’ Ottubru, waqt li mexxa quddiesa f’San Pietru fit-tmiem tal-Assemblea Internazzjonali organizzata mill-Kunsill Pontifiċju għall-Promozzjoni tal-Evanġelizzazzjoni Ġdida, il-Papa Benedittu XVI ħabbar is-Sena tal-Fidi li se tiġi ċċelebrata mit-12 ta’ Ottubru 2012 sal-24 ta’ Novembru 2013. Huwa ħabbar ukoll li dalwaqt se jippubblika Ittra Appostolika biex jispjega l-iskop ta’ din is-sena u l-inizjattivi li se jittieħdu għall-Evanġelizzazzjoni Ġdida. Is-Sena tal-Fidi se tibda f’għeluq il-50 sena mill-ftuħ tal-Konċilju Vatikan II u t-tmiem tagħha ikun fil-festa ta’ Kristu Re.

“Evanġelizzaturi ġodda għall-Evaġelizzazzjoni Ġdida: il-Kelma t’Alla tikber u tixtered.” Din kienet it-tema tal-Assemblea Internazzjonali organizzata f’Ruma mill-Kunsill Pontifiċju għall-Promozzjoni tal-Evanġelizzazzjoni Ġdida nhar is-Sibt u l-Ħadd, 15 u 16 ta’ Ottubru. Għal din l-Assembea Internazzjonali attendew mat-8,000 rappreżentant minn diversi gruppi u movimenti tal-Knisja involuti fl-evanġelizzazzjoni minn madwar id-dinja.

L-istess Arċisqof Mons. Rino Fisichella, President tal-Kunsill Pontifiċju, stqarr li l-missjoni tal-Knisja dejjem kienet l-evanġelizzazzjoni, u din ilha sejra għal aktar minn 2,000 sena. Huwa insista li llum il-Knisja jeħtieġ issib lingwaġġ ġdid u stil ta’ ħajja ġdida b’evanġelizzazzjoni li jkollhom sehem profond tas-sħubija tagħhom fil-Knisja u l-komunità Nisranija li fl-istess waqt li jkunu miftuħa għal oħrajn.

Nhar is-Sibt, 15 ta’ Ottubru, filgħodu delegati ltaqgħu fis-Sala Tas-Sinodu. Fid-diskors tal-ftuħ l-Arċisqof Fisichella ħeġġeġ biex niftħu beraħ il-bibien u nerġgħu nibdew inħabbru l-qawmien ta’ Kristu. Huwa appella għal azzjoni pastorali aktar innovattiva fl-oqsma tal-kultura, tal-migrazzjoni, tal-komunikazzjoni, tal-familja, tal-liturġija, tal-politika u tal-pastorali ordinarja fil-parroċċi.

Wara tkellmu Don Julian Carron, President tal-Fraternità tal-Communione e Liberazione dwar l-evanġelizzazzjoni tal-kultura; Il-professur Adriano Roccucci tal-Comunità di S. Egidio dwar l-immigrazzjoni; il-Brażiljana Luzia de Assis Santiago dwar l-impenn nisrani fil-media, Kiko Arguello tal-Mixja Neokatekumenali dwar l-importanza tal-familja fit-trasmissjoni tal-fidi; Jean-Luc Moens tal-Communantè dell’Emmanuel dwar il-Liturġija ħajja; Salvatore Martinej tat-Tiġdid Kariżmatiku dwar l-impenn nisrani fil-ħajja pubblika u Don Pigi Perini dwar il-Pastorali fiċ-ċelluli parrokkjali ta’ evanġelizzazzjoni. Franco Miano tal-Azzjoni Kattolika Taljana
dwar l-għaqda bejn il-movimenti tal-Knisja u l-Arċisqof ta’ Washington, Donald Wuerl, dwar il-bżonn ta’ fidi qawwija fl-evanġelizzaturi.

Filgħaxija, id-delegati ltaqgħu fis-Sala Pawlu VI fejn ġew indirizzati minn Madre Veronica Berzosa, fundatur tal-Jesu Communio fi Spanja, mill-ġurnalist u kittieb Vittorio Messori li tkellem dwar il-fidi u r-raġuni, mix-xjenzjat Marco Bersanelli dwar ix-xjenza u l-fidi u mill-Isqof Kolombjan Fabio Suescun Mutis dwar l-evanġelizzazzjoni ġdida fl-Amerika Latina.

Aktar tard, id-delegati ġew indirizzati mill-Papa Benedittu XVI. Fid-diskors tiegħu, il-Papa fakkar li s-soċjetà moderna għad għandha għatx għal Alla bħalma kellha 2,000 sena ilu. Huwa qal li l-bniedem modern ta’ spiss huwa konfuż u ma jistax isib tweġibiet għal ħafna mistoqsijiet li jinkwetawh dwar it-tifsir tal-ħajja u għalhekk iħoss ruħu insodisfatt.

Il-Papa sostna li l-Kunsill Pontifiċju għall-Promozzjoni tal-Evanġelizzazzjoni Ġdida twaqqaf bl-iskop li nerġgħu nevanġelizzaw il-pajjiżi tradizzjonalment Insara li ġew effettwati mis-sekularizzazzjoni. Huwa wissa li minkejja l-indifferenza u l-persekuzzjoni, għad hawn ħafna li lesti jiftħu qalbhom u moħħhom biex jaċċettaw l-istedina ta’ Ġesù.

Wara sar kunċert minn Andrea Bocelli b’waqtiet ta’ talb u ta’ esperjenzi minn diversi delegati dwar il-ħidma missjunarja li qegħdin iwettqu fil-parroċċi tagħhom.

L-għada, il-Ħadd, 16 ta’ Ottubru, f’omelija li għamel lid-delegati waqt quddiesa f’San Pietru, qal li t-teoloġija tal-istorja hija aspett importanti u essenzjali fl-evanġelizzazzjoni ġdida. Dan għaliex in-nies ta’ żmienna, wara l-istaġun ikrah tal-imperi totalitarji tas-seklu 20, għandhom bżonn jerġgħu jagħtu ħarsa vera u paċifika fuq id-dinja kif kien għamel il-Konċilju Vatikan II u kif għamlu l-predeċessuri tiegħu.

Huwa qal li l-Knisja ma tridx tfakkar biss id-distinzjoni ġusta bejn il-qasam tal-awtorità ta’ Ċesari u dik ta’ Alla, bejn il-qasam tal-politika u dak tar-reliġjon. Il-Papa sostna li l-missjoni tal-Knisja, bħal dik ta’ Kristu,
hija essenzjalment dik li titkellem dwar Alla u tfakkar fis-sovranità tiegħu. Hija twissi lill-bnedmin, speċjalment lill-Insara li tilfu l-identità tagħhom, id-dritt li Alla għandu fuq dak kollu li huwa tiegħu, jiġifieri l-ħajja tagħna.

Għall-ewwel darba, il-Papa Benedittu XVI iddaħħal fil-Bażilika ta’ San Pietru fuq platform bir-roti li kien juża l-Papa Ġwanni Pawlu II fl-aħħar snin ta’ ħajtu.

Aqra l-istqarrija li  l-Kummissjoni Djoċesana Okkult u Sataniżmu kienet ħarget dwar dan. 

                    Wara iktbilna x’taħseb  int. …  ⇩

UFFIĊĊJU STAMPA  – Il-Kurja ta’ l-Arċisqof, Floriana.  REF: 129/2005

STQARRIJA TAL-KUMMISSJONI DJOĊESANA OKKULT U SATANIŻMU DWAR IL-FESTA TAL-HALLOWEEN

Il-Kummissjoni Djoċesana Okkult u Sataniżmu ntalbet tagħti l-parir tagħha minn diversi ġenituri u Youth Centres dwar jekk iċ-ċelebrazzjoni tal-festa tal-Halloween hijiex kompatibbli jew le ma’ min jixtieq jieħu bis-serjetà l-impenn tas-sejħa nisranija tiegħu.

Filwaqt li l-Kummissjoni tagħraf li spiss hemm persuni żgħar u kbar li jiċċelebraw b’mod newtrali din il-festa biss biex ikollhom okkażjoni li jorganizzaw ċelebrazzjoni jew party b’differenza, din l-istess Kummissjoni tinnota li:

- Il-festa hekk imsejħa ta’ ‘Halloween’ hija ta’ oriġini pagana u ssib l-għeruq tagħha fi twemmin mhux imdawwal mill-misteru ta’ Ġesù Kristu, l-Iben ta’ Alla magħmul bniedem, li bil-mewt u l-qawmien tiegħu fdiena u joffrilna ħajja ġdida, issa u anke wara li ngħaddu mill-passaġġ tal-mewt. Anke jekk hemm min iżomm li din hija biss ċelebrazzjoni antika tal-bidu tax-xitwa, ma’ din il-festa ntrabtu diversi tradizzjonijiet superstizzjużi u tradizzjonijiet oħra li għandhom x’jaqsmu aktar mad-dinja tal-ispiritiżmu u l-okkult fis-sens l-aktar wiesgħa tiegħu. Tradizzjonijiet li fil-fatt ma jaqblux ma’ dak li n-nisrani jemmen fid-dawl ta’ Ġesù Kristu.

- Għal din ir-raġuni, għal min jixtieq jieħu bis-serjetà s-sejħa nisranija tiegħu, il-Kummissjoni jidhrilha li jkun aħjar li din il-festa ma tiġix iċċelebrata. Anke jekk dan isir b’mod superfiċjali u mingħajr l-ebda intenzjoni ħażina, xorta waħda l-istess ċelebrazzjoni ssir sinjal ta’ ftuħ lejn kultura neo-pagana u tlaqqim fil-kultura tal-okkult, komuni ħafna fi żminijietna.

- Ikun aktar jixraq li wieħed jifhem għaliex din iċ-ċelebrazzjoni ma taqbilx mat-twemmin nisrani u jivvaluta mill-ġdid il-wirt nisrani li fih tfakkarna kontinwament il-Knisja:

i. Fl-1 ta’ Novembru, in-nisrani huwa msejjaħ jiċċelebra l-festa tal-Qaddisin kollha, dawk li l-Papa Benedittu XVI, liż-żgħażagħ miġbura f’Cologne, sejħilhom “ir-rivoluzzjonarji veri tas-soċjetajiet tagħna”.

ii. L-għada, imbagħad, issir it-Tifkira tal-Fidili Mejtin kollha, fejn permezz ta’ Kristu nitolbu għall-għeżież mejtin tagħna u aħna stess nirċievu l-ġid li jwassal it-talb tagħhom għalina.

iii. Żewġ tifkiriet li jfakkruna fl-għaqda tal-Knisja tal-art ma’ dik tas-sema.

Ikun sabiħ jekk l-okkażjoni ta’ dawn il-jumejn tagħti lok biex wieħed jiċċelebra l-fidi tiegħu, u fuq l-eżempji tal-qaddisin, jifhem li għan-nisrani, il-ferħ veru jinsab f’relazzjoni ta’ ħbiberija vera u ħajja ma’ Kristu Ġesù, il-Feddej tal-bniedem.

1.  Insellem lilkom ilkoll minn qalbi.  Ġejtu minn kull naħa tad-dinja biex tagħtu ħajja lill-Ewwel Kungress Internazzjonali tal-“Moviment tal-Parroċċi.”  Merħba bikom!  Inħossni ferħan li ninsab magħkom.  Fikom insellem lill-Moviment tal-Fokolarini kollu għax intom fergħa minnu. Insellem lil dan il-Moviment u nuri l-apprezzament tieghi għall-impenn biex dejjem aktar iqanqal il-ħajja tal-Vanġelu fis-soċjeta’ tal-lum.  Nixtieq infakkar ukoll b’mod speċjali lis-sinjorina Chiara Lubich, fundatriċi u president ta’ dan il-Moviment imżewwaq, li jissejjah ukoll “Opra ta’ Marija”, kif ukoll lil dawk kollha li huma mseħbin magħha biex ixerrdu fid-dinja l-imħabba ta’ Kristu.

Is-suġġett li fuqu se taħsbu  f’dawn il-ġranet huwa mportanti ħafna għall-ħajja pastorali  tal-knisja.  Intom qed tistaqsu lilkom infuskom x’inhu meħtieġ  biex tibnu “Parroċċa li hi komunita’!”  M’ghandniex xi ngħidu, dan qed tagħmluh għax intom konvinti li l-parroċċa bħala espressjoni mill-aktar antika fil-ħajja  tal-Knisja, għad għandha valur.  Madankollu fl-aħħar snin ma naqsux dawk li ġiehom  dubju dwar  il-bżonn tal-parroċċa.  Kien hemm min staqsa jekk il-parroċċa tistax tibqa’ taħdem fis-sitwazzjoni tal-bliet moderni, biex b’hekk tkun tista’ tilqa’ l-isfida ta’ dinja li sar fiha minn kollox.   L-aktar li ġie dubju huwa dwar jekk il-parroċċa għandhiex il-mezzi, u ħajja biżżejjed biex l-Aħbar it-Tajba tkun preżenti u tħalli effett, biex tidħol fil-ħajja tat-tfal, taż-żgħażagħ u ta’ l-anzjani, tal-bniedem li rnexxa u ta’ dak li ma rnexxiex, tal-bniedem imwarrab, bla skop, indifferenti.

2. Ix-xogħol li għandha tagħmel il-Knijsa llum jidher enormi u żgur li mhix se tkun il-parroċċa weħidha li se ssolvi dan kollu.  Madankollu l-parroċċa llum wkoll jista’ jkollha staġun ġdid.  Minħabba li ħafna drabi jsib ruħu mħawwad u mitluf, il-bniedem tal-lum ifittex l-għaqda ma’ l-oħrajn.   Wara li jkun ilu jara l-valuri soċjali ta’ madwaru jitfarrku, hu jipprova jingħaqad ma’ esperjenza ta’ għaqda vera u awtentika.  Mhux din hi s-sejħa tal-parroċċa, “li tkun dar tal-familja, fejn hemm l-aħwa u fejn issib ruħek milqugħ,” “għaqda ta’ l-aħwa fl-ispirtu ta’ l-unita’, il-familja ta’ Alla f’post partikulari?”.
Il-parroċċa mhix prinċipalment  organizzazzjoni, biċċa art, jew bini.  Il-Parroċċa hija l-ewwelnet komunita’ tal-fidili.  Fil-fatt hekk ifissirha l-Kodiċi  (Can 515,1).  Dan hu x-xogħol tal-parroċċa llum:  “li tkun komunita’, terġa ssib li hi komunita’.”   Ma nistgħux inkunu nsara kull wieħed għalih waħdu.  Li nkunu nsara jfisser li nemmnu u ngħixu l-fidi tagħna flimkien ma’ l-oħrajn, li nkunu knisja komunita ‘.

Il-Komunita’ titwieled mill-Kelma t’Alla li ngħixu

3.   Imma kif titwieled il-komunita’?   Intom tafu li l-komunita’ mhix sempliċiment  xi ħaġa li tista’ torganizzaha.  Il-komunita’ hija komunjoni.  Biex titwieled il-komunita’ mhux bizzejjed  li jkun hemm is-saċerdot, anke jekk, bħala rappreżantant ta’ l-Isqof, huwa jwettaq biċċa xogħol  ta’ siwi.   Hemm bżonn l-impenn tal-parruċċani kollha,  ghax is-sehem tagħhom jiswa ħafna.  Il-Konċilju Vatikan II saħaq b’ħiltu kollha fuq dan  (Lumen Gentium, 32-33) (Appostolat tal-Lajċi, 2-3; Saċerdoti 2).   Għalhekk ninsab kuntent narakom hekk impenjati, għax tafu bis-sejħa tal-Mulej biex, flimkien mas-saċerdoti tagħkom, jagħmilkom bennejja ta’ kumunitajiet ħajjin.

Żgur li din mhix biċċa xogħol ħafifa.   Din mhix biss komunita’ ta’ bniedem.   Il-komunita’ nisranija hija rejalta’ umana u divina.  Għalhekk il-mistoqsija tagħna dwar kif titwieled komunita’ ssib risposta preċiża u sabiħa:  fuq kollox ma titwelidx mill-isforzi taghna.  Huwa  Kristu nnifsu li jqanqalha. Hija t-tħabbira ta’ l-Aħbar it-Tajba tieghu li jlaqqa’ flimkien lill-insara.  (L.G. 26, P.O.4).  L-origini u l-bidu tal-komunita’ tal-Knijsa hija l-Kelma ta’ Alla imxandra, mismugħa, immeditata u mbagħad imqegħda fil-prattika fil-ħafna sitwazzjonijiet ta’ kull jum, biex nistgħu   ”napplikaw il-veritajiet ta’ dejjem fiċ-ċirkostranzi konkreti tal-ħajja.” (P.O. 4).   Mela mhux biżżejjed tisma’ l-Kelma mhux biżżejjed titħabbar, jeħtieġ ngħixuha. Naf li intom tiltaqghu fi gruppi żgħar  fil-parroċċi tagħkom fejn intom taħsbu fuq il-Kelma ta’ Alla, u anke taqsmu ma’ xulxin l-esperjenzi li tkuni għextu.  Dan igħinkom biex tiskopru l-effett ta’ l-Aħbar it-Tajba fil-komunita’.  Sewwa, issa qiegħdu din l-iesperjenza ghas-servizz ta’ ħutkom irġiel u nisa.  Siru bennejja ta’ komunitajiiet fejn, fuq l-eżempju ta’ l-ewwel komunita’ nisranija, tgħix u taġixxi l-Kelma  (Atti 6,7; 12-24)

Ngħixu l-ħajja bħala Għid li ma jintemmx

3.  Il-komunita’  nisranija  tgħix  permezz tal-Kelma, imma bħala ċentru u qofol tagħha għandha l-Ewkaristija (Christus Dominus, 30).  Permezz ta’ l-Ewkaristija hija tniżżel l-għeruq fil-misteru ta’ Kristu Rxuxtat u permezz Tiegħu,  fil-għaqda tat-tliet Persuni tat-Trinita’ nnifsha.  Din hi l-profondita’ nisranija!  Din hi t-tifsira taċ-Ċelebrazzjoni tal-Liturġija:  huma jdaħluna fil-qalba tal-ħajja ta’ Alla; fihom aħna niltaqgħu ma’ Kristu li miet u rxoxta, u qed igħix fostna.

Imma dak li niċċelebraw irid jibdel lil  ħajjietna.  L-Ewkaristija turina xi jfisser it-taħbit tagħna, id-diffikultajiet li niltaqgħu magħhom fil-ħajja, it-tifsira ta’ kull tbatija.  Dan  kollu, magħqud  mas-sagrifiċċju  ta’ Kristu jista’ jinbidel f’offerta lil Alla u f’għajn ta’ ħajja.   Xejn ma jista’ jżomm il-mixja tal-komunita’ li tgħallmet tgħix  il-ħajja bħala Għid li ma jintemmx:  bħala mewt u ħajja ġdida flimkien ma’ Kristu (Rum 6,4-8)

Sewwa, dan mhuwiex wieħed mill-punti ewlenin li intom tippruvaw tgħixu fl-ispiritwalita’ tal-Moviment  tal-Folkolari:  l-imħabba lejn Ġesu’ Msallab  u abbandunat?  Ghaldaqstant, l-impenn tagħkom mhux imsejjes fuq xi motiv uman biss, fuq sentiment ta’ estużjażmu  li jgħaddi.  Fih imsallab u rxuxtat, intom issibu l-għerq li jagħti l-ħajja lill-komunitatjiet tagħkom u fl-istess ħin it-triq biex jikbru dejjem aktar.  Fih issibu l-mod kif tgħixu s-saċerdozju tagħkom bħala mgħammdin.

Ħajja  soċjali mogħtija l-ħajja bl-imħabba

4.  Kif rajna l-komunita’ nisranija titwieled mill-kelma, u tniżżel l-għeruq fil-misteru ta’  l-Għid.  Imma hemm it-tielet ħaġa li tagħmel il-komunita’:  din hi l-imħabba mnissla f’qalbna mill-Ispirtu s-Santu (Rum 5,5).    Fil-fatt x’tiswa komunita’ mingħajr l-imħabba?  X’tiswa jekk ma twettaqx dak li l-Konċilju jsejjaħ “Liġi” tal-poplu ġdid ta’ Alla:  il-preċett biex inħobbu bħalma Ġesu’ nnifsu ħabb lilna? (L.G.9)  X’tiswa mingħajr l-għaqda sħiħa ma’ l-Isqof, mal-Knisja universali?

Imma din l-imħabba trid tkun tidher.  L-imħabba trid tippenetra u ġġib l-ordni fl-aspetti kollha tal-ħajja tal-bnedmin, trid tnissel ħajja soċjali tassew nisranija.  Dan huwa importanti – bħalma diġa sħaqt drabi oħra “li l-parroċċa ssir dejjem aktar ċentru ta’ ġemgħa ta’ bnedmin insara jiġifieri l-parroċċa ssir komunita’ sħiħa.”  (Diskors 24/1/’82)

Fil-komunitajiet tagħna huma msejħin biex juru minn qabel iċ-Ċivilta’ ta’ l-imħabba.  U dan ifisser li, fuq il-mudell ta’ l-ewwel komunitajiet insara, huma għandhom jibnu strutturi soċjali maħsubin għall-ħtiġijiet ta’ l-għaqda ta’ bejn l-aħwa.  Dan ifisser li jibnu rabtiet  mimlijin  bl-ispirtu tal-paċi u ta’ l-għotja  lil xulxin, solidarjeta’ li tfejjaq is-soċjeta’, ħajja spiritwali komunitarja li  tista’ tgħaqqad l-imħabba ta’ Alla u l-imħabba tal-proxxmu.

Naf li f’din il-laqgħa  qegħdin  tirriflettu  fuq  dawn l-aspetti kollha.  Dawn huma meħtieġa  biex il-komunita’ ssir aktar matura u biex ix-xhieda tagħha tagħti l-frott mixtieq.  Id-dinja tal-lum, li ħafna drabi hi ‘l boghod minn Alla, tagħti aktar każ tal-fatti milli  tal-kliem.  Kien Ġesu’ stess li qabbadna fuq din it-triq; “Minn dan jagħraf kulħadd li intom dixxipli tiegħi, jekk ikollkom l-imħabba bejnietkom” (Ġw 13,35).   Il-parroċċa hija  post privileġġjat biex tingħata din ix-xhieda, billi tirrepti fi żmienna dawk il-ħwejjeġ ta’ l-għaġeb li kien fihom l-ewwel komunitajiet, dik il-meravilja ta’ ħajja ġdida li mhux biss hi spiritwali imma soċjali u storika.

Ħajja flimkien
imfassla fuq ix-xhieda tat-Trinita’

6.  L-ispiritwalita’ tagħkom hija mibnija madwar l-unita’.  Bil-ħajja u bl-impenn tagħkom tixtiequ tagħtu sehem ħalli jitwettaq it-Testment ta’ Ġesu’:  “Biex ilkoll inkunu ħaġa waħda.  Bħalma int, Missier, inti fija u jiena fik, ħa jkunu huma wkoll ħaġa waħda fina.” (Ġw 7,21).  B’dan il-kliem il-Mulej qed jissuġġerilna – bħalma qal il-Konċilju Vatikan II –  Ċertu xebh bejn l-għaqda  tal-persuni  divini u l-għaqda bejn ulied Alla fil-veirta’ u fl-imħabba” (G.S. 24).  Mela l-aqwa mudell ta’ kif għandha tkun il-ħajja tal-bnedmin flimkien:  it-Trinita!  Minn dan il-mudell kbir joħorġu ħafna konsegwenzi anke għall-parroċċa.   Il-vokazzjoni sabiħa tal-Komunita’ tal-knisja hi li tagħmel minn kollox biex issir,  f’ċertu sens, xbieha tat-Trinita’ Qaddisa,  “billi tgħaqqad flimkien id-differenzi  umani (A.A.10)  fl-unita’ bejn ix-xjuħ u żgħażagħ, nisa u rġiel, intelletwali u ħaddiema, sinjuri u fqar.
Mibnija bl-imħabba skond dan il-mudell, il-parroċċi tagħkom jistgħu jwettqu ħidma siewja ma’ dawk li jeħtieġu li xi ħadd iressaqhom lejn Kristu.

Fedelta’ lejn din l-ispiritwalita’ biex tkun tista’ ssir ħmira  tajba.

7.    Minn  qalbi  nawguralkom,  egħżież ħuti,  li  tkomplu  fl-impenn tagħkom.  Jekk tħabirku  biex “titrawmu bil-qalb fl-ispiritwalita’ karateristika” tal-Moviment tagħkom  -  bħalma jistedinkom biex tagħmlu l-Konċilju (A.A. 4)  -  u fl-istess ħin tibqgħu magħqudin sewwa mas-saċerdoti u l-isqfijiet tagħkom, intom issiru ħmira tajba fil-parroċċi tagħkom.  Hekk tkunu tistgħu tgħinuhom jiskopru u jkabbru dejjem aktar il-vokazzjoni tagħhom li jsiru komunita’.

Taqtgħux qalbkom mid-diffikultajiet.  Kunu mezzi ta’ għaqda fost il-gruppi, movimenti u għaqdiet tal-komunitajiet tagħkom!

Maria,  Omm il-Knisja,  tħariskom  fil-mixja  tagħkom u  fil-ħidma tagħkom.  Ħadd bħalha, li tat ‘il Ġesu’ lid-dinja ma jista’ jgħinkom biex fil-parroċċi taghkom jiddi d-dawl  ta’ Kristu.  Jekk jiġri hekk il-parroċċi  tagħkom iwettqu  dejjem aktar il-vokazzjoni tagħhom:  li jkunu l-preżenza ta’  Kristu fost il-bnedmin (diskors ta’ Ġwanni Pawlu II 18/2/1979)
Nagħtikom il-Barka Apostolika tieghi!

Ġwanni Pawlu  II

5 ta’ Ottubru, 2011   -    90/2011

QADDEJJA TA’ ALLA  FIL-FAMILJA

Nhar il-Ġimgħa 14 ta’ Ottubru 2011, se ssir laqgħa bit-tema: Henry u Inez Casolani ‘Qaddejja ta’ Alla fiż-żwieġ u fil-familja.’ Il-Kelliem ewlieni se jkun Fr Paul Chetcuti SJ. Se jkun hemm ukoll esperjenzi personali mill-Perit Vincent Cassar u l-Kardjologu Dr Robert Xuereb. Din il-laqgħa se ssir fl-iskola ta’ Santa Monika, B’Kara u tibda fis-7.00 p.m.

Henry u Inez Casolani iżżewġu fid-19 ta’ April 1944 fil-Knisja ta’ Santu Wistin il-Belt. Huma għexu l-ħajja tagħhom ta’ kuljum fiż-żwieġ u fil-familja b’mod straordinarjament tajjeb.  Tul ħajjithom kollha Henry u Inez Casolani ma tilfux il-ħarsa tagħhom minn fuq Alla. Dak kollu li għamlu wettquh b’qalb kbira mimlija mħabba u kompassjoni.  Għexu ż-żwieġ tagħhom b’impenn, fedeltà u entużjażmu.  Kien hemm spirtu ta’ qadi bejniethom fuq l-eżempju ta’ Ġesù. Fil-familja tagħhom kien hemm ambjent qaddis, ambjent ta’ knisja domestika.

Henry Casolani twieled il-Belt Valletta fl-1917 u miet fl-1999. Huwa għamel karriera twila u sabiħa bħala draughtsman mal-Public Works Department u kien ta’ eżempju mill-isbaħ għal sħabu. Inez Casolani twieldet f’Bormla fl-1915 u mietet fl-1992. Hija kienet għalliema iżda kif iżżewġet waqfet mill-professjoni tagħha biex tiddedika ruħha totalment għall-familja. Henry u Inez Casolani kellhom tifla unika, Cecilia, li ta’ dsatax il-sena daħlet soru mas-Sorijiet ta’ St. Joseph of the Apparition.

Henry u Inez kienu żewġ personalitajiet b’karattri differenti minn ta’ xulxin imma sabu l-mezz kif ikunu ħaġa waħda f’dak li hi fundamentali: l-għaqda fl-imħabba t’Alla u li jimxu dejjem il-quddiem fil-prattika tat-tagħlim ta’ Ġesù. Riedu jitqaddsu huma l-ewwel fil-familja u mbagħad għaddew din il-mira lin-nies ta’ madwarhom. Henry Casolani kellu fejqan straordinarju f’għajnejh minn Macular Degeneration u Diabetic Retinopathy bl-intercessjoni tal-Venerabbli, illum Beata, Swor Maria Adeodata Pisani. Henry u Inez Casolani huma xhieda ta’ Kristu u tal-fidi nisranija. Huma eżempju attwali ta’ qdusija fil-ħajja miżżewġa ta’ kuljum.

Ħajr lill-Tony Aquilina 

Min hi din it-tfajla? Hi Chiara Luce Badano, tfajla bħat-tfajliet l-oħra: ferrieħa u fuq ruħha,   tħobb ħafna l-mużika, l-għawm, it-tennis, il-passiġġati fuq il-muntanja…. u mdawra b’ħafna ħbieb. Twieldet Sassello, fil-provinċja ta’ Savona, fid-29 ta’ Ottubru 1971, wara li l-ġenituri tagħha kienu ilhom ħdax-il sena jistennew it-twelid ta’ tarbija.

Għexet f’familja magħquda li tatha trobbija nisranija soda u, bħal sema mimli kwiekeb, ħajjitha kienet mimlija b’atti żgħar ta’ mħabba. Ta’ erba’ snin ġa kienet tara liema affarijiet tal-logħob se tagħti lit-tfal foqra. Kienet tirraġuna b’dan il-mod: “Ma nistax nagħti ġugarelli  imkissrin lil tfal li m’għandhom xejn”. Meta darba, waħda minn sħabha tal-iskola, kellha l-iskarlattina u ħadd ma ried imur jaraha, Chiara tkellmet dwar dan mal-ġenituri tagħha u ħasset li għandha tmur iżżurha u teħdilha l-homework. Qalet: “Hu aktar importanti tħobb milli tibża’”.

Fl-1981, flimkien ma’ ommha u missierha, ħadet sehem fil-Family Fest, manifestazzjoni dinjija organizzata mill-Moviment tal-Fokolari, li saret f’Ruma. Minn hawn bdiet ħajja ġdida għat-tlieta li huma u hi ngħaqdet mal-Ġen, it-tieni ġenerazzjoni tal-Moviment. Flimkien magħhom bdiet tgħix l-ideal tal-unità, deċiża li tgħix il-Vanġelu, li ssaħħret għal warajh. Kienet ukoll impenjata fil-ħajja tal-parroċċa u tad-djoċesi. F’waħda mill-ewwel ittri li kitbet lil Chiara Lubich, il-fundatriċi tal-Moviment tal-Fokolari, wara li kienet ħadet sehem f’Kungress internazzjonali Ġen, qaltilha: “Skoprejt li Ġesù Abbandunat hu ċ-ċavetta tal-għaqda m’Alla, u rrid nagħżel lilu bħala l-għarus tiegħi u nhejji ruħi għal meta jiġi.”

Kellha sbatax-il sena meta, wara logħba tennis, ħasset uġigħ kbir fi spallitha. Bdewlha t-testijijet u ma damux ma sabu li kellha kanċer fl-għadam. Bdiet tmur għall-kura fi sptar Turin, kura li  kienet  tikkaġunalha ħafna tbatija. Iżda hi kienet tiffaċċa kollox b’kuraġġ kbir u kienet toffri kull tbatija lil Ġesù fil-waqt li tgħidlu: “Jekk dan tridu int, jiena wkoll rridu!” Wasal il-waqt meta ma setgħetx timxi aktar u t-tobba ma setgħu jagħmlulha xejn. Kienet tgħix dawn il-mumenti ibsin sostnuta mir-rabta tagħha ma’ Ġesù msallab u abbandunat u kienet tgħid: “Jekk jistaqsuni nixtieqx nimxi, ngħid le, għax issa nħossni tant aktar qrib ta’ Ġesù”. Għalkemm qajla setgħet tiċċaqlaq, hi baqgħet attiva. Kienet issegwi u tinteressa ruħha f’dak kollu li kien qed jiġri madwarha. Stiednet lil ħafna żgħażagħ biex jieħdu sehem fil-Ġenfest ’90 (manifestazzjoni taż-Żgħażagħ għal Dinja Magħquda li saret f’Ruma f’Mejju tal-1990). Hi segwiet it-trasmissjoni diretta permezz tal-antenna li tpoġġiet fuq il-bejt tad-dar tagħha. It-tabib li kien jieħu ħsiebha ma kienx jemmen, iżda hu stess stqarr li minn meta sar jaf lil Chiara ħajtu nbidlet.

Ir-rabta tagħha ma’ Chiara Lubich kompliet tissaħħaħ. Kienet tiktbilha u żżommha infurmata ’kollox. Fid-19 ta’ Lulju tal-1990 kitbitilha hekk: “Il-mediċina ċediet -armi. (…) It-triq li għandi quddiemi hi waħda iebsa… Spiss inħoss t-tbatija taħkimni. Imma dan hu l-Għarus li qed jiġi jżurni; mhux hekk? Iva, limkien miegħek, jiena wkoll ngħidlu: “Jekk dan tridu int, jiena wkoll irridu!”. hiara Lubich weġbitha hekk: “Chiara, tibżax tgħidlu “iva” mument wara l-ieħor. bqa’ żgurha li Hu jagħtik il-forza li għandek bżonn. Alla jħobbok b’imħabba la tarf. Ħsibt li nagħtik isem ġdid: ‘Chiara Luce’ (Dawl); jogħġbok?”

Kien jidher ċar li  wasal iż-żmien li tmur tiltaqa’ ma’ Ġesu’ u għalhekk bdiet tħejji għall-funeral tagħha: ħasbet għall-kant, il-qari, il-fjuri, l-libsa: riedet libsa bajda, bħal dik ta’ għarusa. Chiara Luce telqet lejn is-sema fis-7 ta’ Ottubru 1990. L-aħħar  kliem li qalet  lil ommha kien: “Ċaw ma, qis li tkun kuntenta għaliex jien kuntenta”.

Għadd kbir ta’ żgħażagħ u ħafna saċerdoti ħadu sehem fil-quddiesa tal-funeral tagħha cċelebrata mill-isqof tad-djoċesi. “Nirringrazzjaw lil Alla għal dan ir-raġġ qawwi ta’ dawl”: kien jgħid il-messaġġ ta’ Chiara Lubich għal din l-okkażjoni. L-isqof ta’ Acqui Terme beda l-proċess tal-beatifikazzjoni tagħha, u fit-3 ta’ Lulju 2008, Chiara Luce ġiet iddikkjarata venerabbli.

Fid-19 ta’ Diċembru 2009, il-Qdusija tiegħu l-Papa Benedittu XVI rrikonoxxa l-miraklu li sar bl-interċessjoni tagħha u fil-25 ta’ Settembru 2010, il-Knisja għamlitha Beata. Ġie deċiż ukoll li l-festa tal-Beata Chiara Luce Badano tiġi ċċelebrata fid-29 t’Ottubru.

Ftit jiem wara, fit-3 ta’ Ottubru, waqt żjara fil-belt ta’ Palermo, il-papa Benedittu XVI kien qed jindirizza liż-żgħażagħ u l-familji u qalilhom hekk:

“Naħseb li lkoll tafu li s-Sibt li għadda, 25 ta’ Settembru f’Ruma, ġiet ipproklamata beata ġdida, tfajla Taljana li jisimha Chiara, Chiara Badano. Nistidinkom issiru tafuha: għalkemm għexet ftit snin biss, imma ħajjitha hija messaġġ mill-isbaħ! Hi twieldet fl-1971 u mietet fl-1990, minħabba marda li ma titfejjaqx. Dsatax-il sena ta’ ħajja, ta’ mħabba, ta’ fidi. L-aħħar sentejn għexithom fi tbatijiet kbar, imma kienet dejjem fl-imħabba u fid-dawl, dawl li kien jiddi madwarha, imma li kien ġej minn ġewwa fiha, minn qalbha li kienet mimlija b’Alla. U dan kif seta’ jkun possibbli? Kif jista’ jkun li tfajla ta’ 17, 18–il sena tgħix tbatija bħal dik, mingħajr ebda tama ta’ fejqan, u madwarha xxerred l-imħabba, is-sliem, il-paċi u l-fidi? Ovvjament kienet il-grazzja t’Alla. Imma din il-grazzja kienet ippreparata u mgħejjuna min-nies ta’ madwarha: mgħejjuna l-ewwelnett mit-tfajla stess, imbagħad bla dubju ta’ xejn bl-għajnuna ta’ ommha u ta’ missierha u anke ta’ ħbiebha.

L-ewwel u qabel kollox il-ġenituri, il-familja. Illum irrid nenfasizza magħkom l-importanza tal-ġenituri u l-familja. Il-ġenituri tal-Beata Chiara Badano għadhom ħajjin, u kienu Ruma għall-beatitfikazzjoni ta’ binthom. Jien iltqajt magħhom personalment. Binthom kienet mimlija bid-dawl t’Alla. U dan id-dawl, li ġej mill-fidi u mill-imħabba, xegħluh huma l-ewwel fit-tifla tagħhom: missierha u ommha xegħlu fil-qalb ta’ binthom il-fjamma ċkejkna tal-fidi. Huma għenu lil binthom Chiara biex iżżommha mixgħula dejjem, anke fil-mumenti diffiċli tat-trobbija u l-iżjed fil-mumenti iebsa tal-marda. Hija dik il-fjamma li naraw b’mod simboliku fir-rit tal-Magħmudija, meta s-saċerdot jgħid: ĦUDU D-DAWL TA’ KRISTU. Din hija fjamma li rridu nżommuha dejjem tixgħel. Ħbieb, dan hu l-messaġġ li xtaqt nagħtikom illum: ir-rabta ta’ bejn il-ġenituri u t-tfal, kif tafu, hi fundamentali…”.

Sa minn meta twaqqaf il-Moviment Ġen, Chiara Lubich dejjem sfidat liż-żgħażagħ biex jimmiraw lejn ideal għoli: “Tridu tkunu ġenerazzjoni ta’ qaddisin”. Chiara Luce Badano mhijiex l-unika waħda li waslet sa hawn; hemm żgħażagħ oħra bħalha. Bħalissa għaddej il-proċess ta’ beatifikazzjoni  ta’ tlieta oħra minnhom.

Ara s-sit uffiċċjali tal-Beata Chiara Luce Badano …> ikklikkja

Ħutna,

Qegħdin niktbu din l-ittra tagħna wara mumenti ta’ skiet u riflessjoni. Xtaqna li dan il-kliem ngħiduh f’mument ta’ kalma, bit-tama li jidħol fil-qalb ta’ kull wieħed u waħda minna. Inħossu li hemm bżonn jittieħdu deċiżjonijiet importanti fuq il-kwalità tal-ħajja nisranija ta’ kull wieħed u waħda minna. Dawn id-deċiżjonijiet jgħinuna biex ikollna Knisja li tkun ħmira għas-soċjetà ta’ llum. Qegħdin ngħaqqdu din l-Ittra Pastorali max-xahar ta’ Ottubru, biex ngħaqqduha max-xahar tar-Rużarju, ħalli tkun imsaħħa minn din it-talba lil Marija Santissima.

Ir-Realtà tal-lum

Dawn id-deċiżjonijiet irridu neħduhom fil-kuntest ta’ tliet realtajiet kbar li jagħmlu aktar diffiċli l-għażla tagħna għal iktar twemmin fil-Mulej u għal iktar impenn biex nibnu l-Knisja fuq it-tagħlim ta’ Ġesù.

L-ewwel realtà hi l-bidla qawwija u mgħaġġla tas-soċjetà u l-kultura ta’ madwarna. Għan-nisrani huwa diffiċli jidentifika lilu nnifsu f’kollox ma’ din il-kultura. Hija kultura li għenitna ngħixu aħjar xi valuri bħall-ambjent, l-aċċettazzjoni tal-persuni bi sfond kulturali differenti, il-ftuħ għar-realtà globali bl-opportunitajiet u r-riskji tagħha. Iżda min-naħa l-oħra saret iktar diffiċli li tgħix il-valuri nsara bħalma huma: r-rispett tal-individwu mit-tnissil sal-aħħar mument tal-ħajja, taż-żwieġ dejjiemi u ta’ familja stabbli fejn it-tfal jistgħu jitrabbew f’sigurtà, tal-esperjenza ta’ Alla li permezz tat-talb twassal għal impenn fil-Knisja u impenn kristjan fis-soċjetà.

It-tieni realtà hi li minħabba d-dħul tad-divorzju f’pajjiżna, issa għandna soċjetà li iktar faċli tindarab fil-kuntest taż-żwieġ u l-familja. Dawn għandhom parti importanti ħafna fil-qafas tas-soċjetà u tal-Knisja. Għax id-dħul tad-divorzju jferi kull żwieġ, kemm dak ċivili, kif ukoll iż-żwieġ sagrament.

It-tielet realtà hija l-każ ta’ abbużi ta’ minorenni minn xi saċerdoti. Kull tip ta’ abbuż iġib tbatija enormi. Inħossuna umiljati quddiem il-vittmi tal-abbuż, kif ukoll quddiem il-Knisja u quddiem is-soċjetà li għaliha ġejna mibgħuta biex inkunu xhieda.

Deċiżjonijiet

Quddiem dan kollu, kull wieħed u waħda minna f’dawn il-ġranet irid jieħu deċiżjoni importanti: li jgħix ta’ nisrani f’dawn iċ-ċirkustanzi. U din mhijiex deċiżjoni faċli. Tista’ tittieħed biss jekk il-fidi tagħna fi Kristu, u l-imħabba tagħna għalih u għall-Knisja jkunu iktar qawwija minn dawn il-ġrajjiet għax huma bbażati fuq il-wegħda ta’ Kristu li jibqa’ mal-Knisja sal-aħħar taż-żmien. Nafu li dan huwa possibbli għaliex għexuha l-ewwel dixxipli tal-Mulej – li naqraw fuqhom fl-Atti tal-Appostli – f’ċirkustanzi ibsin u rnexxilhom jgħaddu it-tagħlim ta’ Ġesù lil ta’ warajhom.

Il-Knisja bdiet madwar Kristu mejjet fuq is-Salib u l-biża’ li dan il-fatt ġab fuq id-dixxipli għaxħasbu li kien intemm kollox; l-eperjenza tad-dgħufija tal-membri – Ġuda li ttradih, Pietru li ċaħdu tliet darbiet, l-appostli l-oħra, ħlief  Ġwanni, li telquh waħdu fuq is-Salib. Ma’ din kien hemm ukoll il-persekuzzjoni minn parti kbira tal-Komunità Lhudija li Ġesù kien tant iħobb u mill-Imperu Ruman. Bil-qawmien tiegħu Kristu ta lill-Knisja il-qawwa li tegħleb id-djufija fi ħdanha u tibdel kull  persekuzzjoni f’opportunità ta’ mħabba akbar.

Se jkun hemm min jieħu d-deċiżjoni li jibqa’ bogħod jew joħroġ mill-Knisja. Aħna lil dawn l-aħwa m’għandniex niġġudikawhom. L-imħabba ta’ Alla l-Missier lejn kull persuna, hi min hi, ma tħalliniex niġġudikaw, iżda biss inħobbu, u nħobbu kif ħabb Alla l-Missier li bagħat lil Ibnu biex jurina l-Verità fl-Imħabba li hija l-qofol tal-Fidi tagħna.

L-Istorja tal-Knisja f’pajjiżna

Il-Knisja, anki dik f’Malta, irnexxielha tgħix f’kull ċirkustanza. Fl-istorja tagħha hija għaddiet mill-ewwel żminijiet, meta San Pawl ħalla l-ewwel komunità kristjana f’Malta. Il-ġrajjiet ta’ dik il-komunità huma mistura fl-istorja, iżda ma nistgħux ma ngħaqqduhomx mal-persekuzzjoni li għaddiet minnha l-Knisja fl-Imperu Ruman. Anki fil-mument tal-ħakma mill-Għarab, mill-istudji li saru jirriżulta li kien hemm ‘ġemgħa żgħira’ li rnexxielha żżomm il-fidi.

Kien hemm sekli meta l-istorja tal-Knisja f’pajjiżna kienet imdawra minn appoġġ kulturali u numeriku tal-membri tagħha. Dawn iż-żminijiet taw lil pajjiżna wirt kulturali u reliġjuż li għadu qawwi sa llum, u dan issarraf f’ħafna ġid. Iżda nagħmlu żball jekk naħsbu li dawn il-kundizzjonijiet huma ta’ importanza ċentrali. Meta naħsbu hekk, jista’ jiġrilna li meta jitneħħew jew jinbidlu dawn il-kundizzjonijiet, jaqa’ kollox.

Infatti, meta nagħrfu li l-appoġġ kulturali u politiku hu biss il-qoxra tal-Knisja u tal-Fidi tagħna, allura għandna nfittxu li nintrabtu ma’ dak li hu ċentrali fil-fidi tagħna, Sidna Ġesù Kristu, u nibnu realtà ġdida fiċ-ċirkustanzi ta’ llum. Hija l-isfida tal-evanġelizzazzjoni l-ġdida li l-Knisja qed tfittex illum. Din tista’ sseħħ biss jekk mal-bini tal-Knisja bħala komunità fl-aspetti esterni tagħha ikun hemm ukoll il-bini minn ġewwa tar-rabta ta’ kull wieħed u waħda minna mal-Mulej Ġesù. Fuq kollox il-Knisja tagħmel ‘suċċess’ biss jekk hi tkun mezz ta’ salvazzjoni għall-bnedmin kollha.

Il-Knisja tista’ tgħaddi mingħajr appoġġ kulturali u politiku għax għandha l-qawwa spiritwali ġewwa fiha. Il-Knisja kontinwament tfittex tisfija minn dak li hu appoġġ estern għal dik li hija s-saħħa tal-konvinzjoni tal-Fidi u tal-Ispirtu s-Santu. Huma mumenti qawwijin ta’ qawmien meta min jagħti s-sehem tiegħu fil-Knisja ma jkollux l-appoġġ ta’  privileġġi soċjali, u allura jħoss il-ħtieġa li jintelaq f’idejn il-qawwa ta’ Alla.

Għażliet

L-Għażla li rridu nagħmlu hija ħafna iktar profonda minn dik li xi drabi t-tradizzjoni u l-kultura jimbuttawna biex nibqgħu marbutin mal-Knisja. L-għażla trid tkun jekk nagħżlux li nkun parti mill-Knisja li trid twassal lil Kristu. L-għażla tiegħi personali, l-għażla tal-familja tiegħi, trid tibda minn ġewwa u tiġi msaħħa bit-talb u bis-solidarjetà tal-Komunità tal-Fidili. Inkella wieħed ma jsibx saħħa biżżejjed biex jgħixha fiċ-ċirkustanzi ta’ llum. Hija din l-esperjenza li aħna qegħdin nipproponu lilkom illum.

Irridu nirraġunaw bħal San Pawl meta kien imtaqqal minn ‘xewka’: li jrid jiddependi iktar fuq is-saħħa tal-Mulej milli fuq il-qawwa tiegħu biss. Dawn kienu l-kliem li qallu l-Mulej: “Biżżejjed għalik il-grazzja tiegħi; għax il-qawwa tiegħi tidher fl-aqwa tagħha fejn hemm id-dgħajjef” u l-konklużjoni ta’ Pawlu: “għax meta nkun dgħajjef, inkun qawwi” (2 Kor 12, 9.10).

Is-sejħa tal-Papa Benedittu XVI

Nixtiequ nagħlqu din l-ittra billi ningħaqdu mal-Papa Benedittu XVI li jgħidilna fuq ir-realtà tal-Knisja llum:

“Fil-klima l-kbira kulturali ta’ ħafna pajjiżi tal-Punent, l-għeruq tal-Kristjaneżmu għandhom posthom hemm. Imma qegħdin dejjem aktar nersqu lejn Kristjaneżmu ta’ deċiżjoni personali… Ikolli ngħid, min-naħa l-waħda llum jeħtieġ li nissodaw dan il-Kristjaneżmu tal-konvinzjoni, nerġgħu nagħtuh ħajja mill-ġdid u nferrxuh, biex aktar bnedmin jerġgħu jagħrfu jgħixu l-fidi tagħhom. Min-naħa l-oħra rridu nagħrfu li aħna sempliċement m’aħniex identiċi mal-kultura u man-nazzjon – imma li għandna s-saħħa li nagħtu lill-pajjiż valuri li taċċetta li tieħu u nsaħħuhom, ukoll jekk il-maġġoranza mhumiex Insara li jemmnu” (Dawl id-Dinja, 2011, 169).

Huwa fid-dawl ta’ din kollu li l-Knisja f’pajjiżna trid terġa’ tifli u tara l-missjoni li ħallielna il-Qdusija Tiegħu l-Papa Benedittu qabel ma ħalla Malta:

“Ħalluni nħeġġiġkom għal darb’oħra biex trawmu għarfien profond tal-identità tagħkom u tħaddnu r-responsabbiltajiet li joħorġu minnha, l-aktar billi tmexxu ‘l quddiem il-valuri tal-Evanġelju li jagħtikom viżjoni ċara tad-dinjità umana u tal-oriġini u d-destin komuni tal-umanità. Kunu ta’ eżempju f’artkom u barra minn artkom ta’ ħajja nisranija dinamika. Kunu kburin bis-sejħa nisranija tagħkom. Għożżu l-wirt reliġjuż u kulturali tagħkom.”

Ommna Marija li kienet f’nofs l-appostli titlob lil Alla l-Missier biex jibgħat l-Ispirtu s-Santu fuq il-Knisja, takkumpanjana fit-talb tagħna fix-xewqa ta’ qawwa ġdida fil-Missjoni tagħna li nagħmlu lil Binha ħaj u preżenti fostna permezz tal-Komunità tal-Knisja. Nitolbukom li din l-intenzjoni tagħmluha ukoll fir-Rużarju li nħeġġukom tgħidu kuljum.

Nagħtukom il-barka pastorali tagħna.

+  PAWLU CREMONA O.P.                                                         +  MARIO GRECH

     Arċisqof ta’ Malta                                                                           Isqof ta’ Għawdex

Joe Farrugia

Niftakarni preżenti għall-Assemblea Parrokkjali li fiha Monsinjur Arċisqof Pawlu Cremona temm l-ewwel Viżta Pastorali tiegħu fil-parroċċa ta’ H’Attard.

Dakinhar laqgħatni suġġeriment li kien għamel lill-dawk preżenti sabiex fil-ħidma pastorali tagħha, il-parroċċa ssib insara li lesti jidħlu għall-missjoni ta’ evanġelizzazzjoni. Qalilhom li dan setgħu jagħmluh billi jinqasmu fi gruppi żgħar skont territorji stabiliti.  Imbagħad il-membri ta’ kull grupp għandhom jinbnew bejniethom fuq il-Kelma ta’ Alla u jmorru jistiednu lil persuni oħra mill-istess teritorju biex jissieħbu magħhom f’ din l-esperjenza nisranija.

Għalkemm wara dakinhar, l-Arċisqof tenna din l-istedina f’diversi okkażżjonijiet u f’diversi parroċċi oħra, madankollu għandi dubju serju dwar kemm parroċċi bdew jaħdmu bis-serjetà fuq dan il-proġett ambizjuż. Naf li uħud minn dawk li semgħu din il-proposta ma fehmuhiex. Kien hemm min ħaseb li dawn se jkunu xi għaqdiet reliġjużi ġodda, l-istess bħal dawk li diġà għandna. Oħrajn, fehmu sewwa dak li qal l-Arċisqof, imma fehmu wkoll li proġett bħal dan jitlob impenn serju u ħafna sagrifiċċju.  Forsi kien għalhekk li uħud qatgħu qalbhom u pposponew id-deċiżjoni tagħhom sine die.

Dan l-aħħar jiem erġajt kont qed naqra l-enċiklika tal-Papa Ġwanni Pawlu II, Redemptoris Missio.  Kienet publikata 21 sena ilu, imma minħabba li tidħol sewwa fil-fond dwar l-evanġelizzazzjoni ġdida, ħassejt li hija tassew attwali fiż-żmienna u għalhekk sibt ħin biex nerġa naqrha.  Fiha il-Papa kien tkellem propju dwar dak li Monsinjur Arċisqof insista dwaru għal dawn l-aħħar snin. Il-Papa kien sejħilhom, “komunitajiet ekkleżjali di base”, imma dawn huma spiss magħrufin ukoll b’ismijiet oħra.

Ġwanni Pawlu II kiteb li f’bosta Knejjes kienu qed jinbtu b’ħeffa kbira komunitajiet ekkleżjali di base, u li huma meqjus bħala impenn ewlieni tal-ħidma pastorali. Qal li dawn huma gruppi żgħar ta’ nsara f’livell ta’ familja jew ta’ ambjent ċkejken, li jiltaqgħu flimkien għat-talb u l-qari tal-Kotba Mqaddsa, għall-katekeżi, għall-istudju flimkien ta’ problemi li jolqtu kemm il-bniedem u kemm il-Knisja.

Il-Papa kompla li dawn il-komunitajiet qegħdin juru ruħhom bħala ċentri mill-aqwa ta’ formazzjoni nisranija u għalhekk jkunu jistgħu jimpenjaw ruħhom għall-ġid ta’ kulħadd. Huma tassew sinjal tal-qawwa tal-Knisja u strument ta’ formazzjoni u evanġelizzazzjoni.  Huma bidu tajjeb għal soċjetà mibnija fuq iċ-ċiviltà tal-imħabba.

Fl-enċiklika tiegħu, Ġwanni Pawlu II jgħid li dawn il-gruppi jridu jkunu parti mill-parroċċa u b’hekk jgħinuha ma tibqgħax ċentralizzata, imma jorganizzawha. Huma jridu jxettli għeruqhom f’ambjenti emarġinati u rurali, u b’hekk isiru l-ħmira ta’ ħajja nisranija, ta’ kura għall-foqra u l-imwarrbin, u ta’ mpenn għall-bidla fis-soċjetà.

F’dawn il-komunitajiet kull nisrani jġarrab esperjenza komunitarja, u hekk iħossu li hu membru attiv tal-Knisja u li huwa lest biex jagħti sehmu fl-impenn ta’ kulħadd. B’dan il-mod, dawn il- komunitajiet ikunu strumenti ta’ evanġelizzazzjoni. (Redemptoris Missio 51)

Is-soċjetà li qed ngħixu fiha u li aħna parti minnha għaddejja minn tibdil kbir u mgħaġġel u għalhekk il-parroċċi tagħna jridu jaffrontaw l-isfidi ta’ żmienna bi strutturi u għodod mġedda wkoll.  Il-Knisja trid tagħraf is-sinjali ta’ żminijietna u tfittex tifhem il-messaġġ li Alla jrid iwasslilha permezz tagħhom.

L-evanġelizzazzjoni tallum trid titlaq qabel xejn minn ħeġġa ġdida f’qalb dawk kollha li jqisu lilhom infushom parti minn din il-Knisja.  Spiċċa ż-żmien ta’ nsara passivi li posthom fil-Knisja huwa biss li fi tmiem il-ġimgħa “jisemgħu” il-quddies u xħin tasal il-qoffina maġenbhom idaħħlu idejhom fil-but biex jitfgħu xi ħaġa. Il-lajċi nsara jista’ jkollhom ħafna aktar x’joffru fil-komunità.

Jeħtieġ li l-parroċċa tfittex metodi u espressjonijiet ġodda kif twassal lil Kristu f’kull triq u f’kull dar.  Li f’din il-missjoni hija timpenja ħafna aktar minn uliedha u li lil dawn tagħtihom l-aħjar  formazzjoni possibbli. Mhix sfida faċli u ħafna għadhom qed jagħmlu d-domanda, “Imma kif?”

Nemmen li jekk nagħrblu sewwa l-proposta tal-Arċisqof tagħna u niflu dak li kiteb il-Papa Ġwanni Pawlu II fir-Redemptoris Missio, aktarx niskopru li dawn l-komunitajiet żgħar ta’ nsara fil-bażi ta’ kull parroċca jistgħu jkunu t-tweġiba għad-domanda tagħna.

Minn Joseph Galea

Ħu kollu ħtija ta’ kelb li ma nkunx attent għal-liturġija li tkun għaddejja fil-katidral ta’ San Ġwann. Ili ħafna naraħ dan il-kelb, dejjem żvelt għalkemm qiegħed f’pittura mal-ħajt fil-għoli, minn Mattia Preti, u restawrat maż-żmien bħall-bqija tas-saqaf. Tarah fuq ix-xellug, fl-ewwel arkata min-naħa tat-titular.

Il-membri tal-Museum tal-Belt u tal-Furjana kellhom id-drawwa li fil-Ħdud tal-festi liturġiċi maġġuri jattendu għaċ-ċelebrazzjonijiet liturġiċi prinċipali li jsiru f’San Ġwann, u jieħdu magħhom il-membri żgħar u żgħażagħ. Dawn ta’ l-aħħar ma kellħomx entużjażmu għal din l-għamla ta’ festi, imma normalment ma kinux ifallu. F’mixja mill-Furjana għall-Belt, lejn okkażjoni xejn interessanti, wieħed jifimha li konna nkaxkru xi ftit riġlejna sakemm naslu. L-għodwa ma kinitx tawgura għat-tfal: il-Quddiesa kienet tkun twila, b’kant bil-latin b’ilħna ta’ rġiel biss, għax kienu jkantaw is-seminaristi. Għat-tfal il-funzjoni donnha li ma kienet se tispiċċa qatt. Iċ-ċerimonji tal-monsinjuri, purċissjoni ta’ serbut twil, l-inċens bil-pawsa, ukoll kienu jikkontribwixxu għan-nuqqas ta’ stennija bil-ħerqa ta’ dawn il-festi.

Għalħekk li l-kelb tas-saqaf rajtu għal ħafna u ħafna sigħat, u l-lum, kull meta mmur il-katidral, nagħtiħ titwila u narah għadu fl-istess tarġa, tiela lejn l-Għammiedi fil-pittura. Imma issa ma nirraġunax l-istess! Jiġuni tifkiriet sbieh li jistidnuni nrodd ħajr lil dawk l-irġiel li kienu jeħduna San Ġwann, u ngħid talba għal dawk fostħom li lill-qaddis qed jarawħ fil-ġenna. Kienu huma li nisslu fija mħabba lejn dak li hu tassew sabiħ. Il-pittura tas-saqaf m’għadnix naraha qisha film biex ninsa d-dwejjaq ta’ ċerimonja twila. Illum, il-persuni li kienu jeħduna l-Belt inħossħom ħdejja. Kbirt magħhom, mal-lealta’ tagħhom, mal-entużjażmu tagħhom  mal-imħabba tagħhom lejn il-Knisja. Dawn iċ-ċerimonji, li lilhom ma jidhrux li kienu jdejquhom, kienu biss sinjal tar-rabta tagħhom ma’ dak li hu sagru.

Illum ngħid li ma kienx biss sagru, imma wkoll il-kultura sagra. Il-katidral ta San Ġwann jiġbor fih kultura ta’ Knisja li tul is-sekli iċċelebrat is-sabiħ fil-liturġija tagħha u ħabbritu b’mod li jibqa’ għal ġenerazzjoni wara l-oħra, fl-iskultura u fil-pittura bħal ma hu l-każ ta’ San Ġwann. Mhux ta’ b’xejn li meta jidħlu fil-katidral u jagħtu l-ewwel daqqa t’għajn madwarhom, l-aktar kif jerfgħu rashom ‘il fuq lejn is-saqaf grandjuż, dawk li jżuru San Ġwann għall-ewwel darba, jesprimu l-istagħġib tagħhom quddiem sbuħija ħekk rari. Min għandu ċertu gosti, jidħol f’iktar dettalji.

Taf li hekk kienu jagħmlu l-membri tal-Museum li kienu jeħduna l-Belt? Kienu jispjegawlna l-pitturi u  jgħadduna minn tapizzerija fjamminga għal oħra, li f’dak iż-żmien kienu jdendlu bejn l-arkati fil-festi l-kbar. Min jaf kemm-il darba wieħed minnhomi kien jeħodna ħdejn il-monument favorit tiegħu, f’kappellun fin-naħa tal-lemin tal-Knisja, fl-auberge ta’ l-Ispanjoli. Ħemm żewġ Torok, b’idejhom marbutin wara. Kien jinnutalna li jidhru l-vini f’dirgħajn it-Tork tan-nokkli.

• It-tifkiriet li jġibli l-kelb fil-pittura tal-katidral iġagħluni nirrifletti. Ħi ħasra li għal ħafna, l-arti sagra mhix ħobż għal snienħom u għalhekk jgħixu ħajja ta’ medjokrita’ kulturali.

• Mhemmx għalfejn tkun artist jew li tkun taqra l-kotba dwar l-arti biex tiggosta l-wirt li ħallew ta’ qabilna. Biżżejjed dispozizzjoni li tgħinek tapprezza dak li maż-żmien ħareġ mill-ħsieb u minn idejn nies ta’ ħiliet mhux komuni. Trid tkun konvint li l-arti sagra hi element importanti fir-reliġjon nisranija. Dan il-mezz ta’ komunikazzjoni qatt ma tilef l-aspett edukattiv tiegħu.

• Tajjeb li titħallat ma’ nies li jħobbu l-kultura u li kull diskussjoni magħhom tħallik b’togħma tajba. Min-naħa l-oħra, hu l-arti sagra bħala djalogu bejnek u bejnha; ara pittura, skultura, eċċ u waqt li qed tikkunsidraha aħseb x’qed iwassallek biha l-Mulej.

• Ma niskantawx li hawn Maltin li qatt ma daħlu f’San Ġwann. Jafu biss il-knisja tar-raħal u dak kollu li jsebbaħha. Lil dawk ta’ madwarna ngħidulħom b’arti ta’ knejjes oħra, u nħajruħom (la qed insemmu lil San Ġwann) biex meta jinzertaw il-Belt jgħaddu sal-katidral u jduruh bl-attenzjoni.

• L-arti sagra għandħa storja twila, li mxiet maż-żmien. L-istil hu l-prodott tal-istorja li jkun għaddej minnha l-pajjiż kif ukoll tal-karatteristika tal-pitturi, l-iskulturi, li jkunu ħolqu l-opra ta l-arti. Ħuwa fatt li hemm pitturi klassiċi, bi xbihat li jifhimħom kulħadd, u ħemm pitturi moderni, li xogħolhom trid tifħimħom il-qalb. Irridu nrabbu fina kultura li nagħmlu
  distinzjoni, u hekk napprezzaw kemm dak li jolqotna direttament u kemm dak li
  nsofru biex naċċettawh.

Il-kelb tal-pittura fetaħli tieqa f’ħajti ħekk li ftakart f’dawk li kienu ta’ ġid għalija fi tfuliti u għalhekk għaddejt dawn is-suġġerimenti lejn rikonoxximent għall-arti sagra. Anke llum, tibqagħli t-tentazzjoni li nħares lejħ iktar milli nsegwi l-funzjoni li tkun għaddejja fil-katidral!

Wara l-artiklu ara wkoll il-kummenti u suġġerimenti aktar ‘l isfel, fosthom dawk ta’ saċerdot li għamel 40 sena fil-Brażil …↴

Sa mill-bidu tal-pontifikat tiegħu, il-Beatu Papa Ġwanni Pawlu II, saħaq fuq il-bżonn ta’ Evanġelizzazzjoni Ġdida, iżda kien fl-enċiklika tiegħu Redemptoris Missio (RM) li fiha huwa mhux biss spjega x’inhija din l-evanġelizzazzjoni iżda wkoll daħal f’dettal dwar x’għandhom ikunu l-kwalitajiet tagħha. Id-dokument kien pubblikat fis-7 ta’ Diċembru 1990, propju għeluq il-25 sena mid-digriet tal-Konċilju Vatikan II, Ad Gentes. Fih il-Papa juri kif id-differenzi fil-ħidma tal-missjoni waħdanija tal-Knisja, ma jiġux mill-missjoni nfisha, imma miċ-ċirkostanzi li fiha trid isseħħ.

L-ewwel tip ta’ ħidma missjunarja tal-Knisja hi dik li ssir ma’ popli jew gruppi li ma jafux bi Kristu. Hemm imbagħad dik il-ħidma pastorali li ssir ma’ komunitajiet insara fejn il-fidi hija waħda ħajja, fejn l-insara jagħtu xhieda tal-evanġelju f’pajjiżhom u jħossu li huma fid-dmir li jagħtu sehemhom fil-missjoni universali tal-Knisja.  It-tielet ħidma ssir ma’ dawk in-nazzjonijiet fejn gruppi sħaħ ta’ nsara tilfu s-sens ħaj tal-fidi, forsi wkoll iqisu ruħhom li m’għadhomx membri tal-Knisja, jew qegħdin jgħixu ħajja ‘l bogħod minn Kristu u mill-evanġelju tiegħu. F’dan il-każ hi meħtieġa “evanġelizzazzjoni ġdida”, biex dawn il-komunitajiet jerġgħu jiġu evanġelizzati. (RM 33)

Minkejja li kienet pubblikata 21 sena ilu, madankollu din l-enċiklika forsi saret aktar attwali llum minn meta nkitbet. F’pajjiżna qiegħed dejjem jikber u jinħass aktar il-bżonn ta’ ħidma pastorali serja li tindirizza b’mod ġdid il-ħtiġijiet ta’ kultura, tradizzjonalment nisranija, imma li tant hija ‘l bogħod milli tifhem u tħaddan bis-serjetà l-messaġġ tal-evanġelju. U dan minkejja li certi attivitajiet jew ċelebrazzjonijiet, hekk immsejħa “reliġjużi” bħal donnhom kibru u żdiedu.
Għalhekk biex din l-evanġelizzazzjoni ġdida titwettaq sewwa u b’mod li tħalli l-frott, ikun tajjeb li niflu sewwa dawk il-kwalitajiet, li skont l-istess Papa Ġwanni Pawlu II, hija għandu jkollha.

Kristoċentrika.
L-evanġelizzazzjoni ġdida trid qabel xejn tkun iċċentrata kompletament fuq il-persuna ta’ Ġesù Kristu. Il-Knisja mhux biss trid ixxandar il-kelma ta’ Alla, mwassla lilha mill-Imgħallem tagħha, iżda trid qabel xejn twassal lilu stess għaliex kif naqraw fl-istess prologu tal-evanġelju skont San Ġwann, Kristu nnifsu huwa l-Kelma nfisha.

Fir-Redemptoris Missio, il-Papa Ġwanni Pawlu II juri li l-Knisja, sa mill-ewwel predikazzjoni tagħha wasslet lil Ġesù bħala l-uniku Feddej tal-bniedem. Huwa jinsisti li min jipprova jifred il-kelma mill-persuna ta’ Ġesù Kristu jkun qed imur kontra l-istess fidi nisranija (RM 5 u 6)

Illum huwa mportanti ħafna li kontinwament infakkru dwar il-ħtieġa ta’ evanġelizzazzjoni Kristoċentrika għaliex huwa faċli ħafna li naqgħu għat-tentazzjoni li nwasslu evanġelju mingħajr Kristu. Mhux darba jew tnejn nisemgħu priedki sħaħ u korsijiet ta’ eżerċizzi, suppost spiritwali, fejn nippruvaw inwasslu valuri f’kuntest purament soċjali, iżda li fih donnu Kristu ma għandu ebda post. Inkella nistgħu nitfgħu l-attenzjoni tagħna aktar fuq dawk is-sinjali tal-Knisja, li jidħru minn barra, milli fuq Kristu, li dawn is-sinjali suppost jkunu kollha jippuntaw lejH.

Korresponsabiltà.
L-evanġelizzazzjoni ġdida hija r-responsabiltà tal-poplu ta’ Alla kollu. Din saħaq dwarha il-Konċilju Vatikan II, l-aktar fid-dokument Lumen Gentium, iżda minnkejja li għaddew kważi ħamsin sena, bosta nsara għadhom iħossu lilhom infushom esklużi jew eżentati minn dan id-dmir li huwa mogħti lil kull persuna dakinhar tal-magħmudija.

Ħasra li llum bosta għadhom jaħsbu li dmirhom fil-Knisja huwa biss li joqgħodu bilqegħda u fedelment jirċievu dak li huwa mgħoddi lilhom mis-saċerdoti. Jaħsbu li fil-Knisja huma biss il-ftit li xogħolhom huwa biex jagħtu u jamministraw, waqt li l-maġġoranza, qegħdin hemm biss biex jirċievu.  Mill-banda l-oħra, anke fost l-istess lajċi mpenjati fil-ħidma tal-Knisja, għad hemm bosta li jħarsu lejn din il-ħidma tagħhom bħala għajnuna f’xogħol li huwa tas-saċerdot u għalhekk huma qegħdin biex jgħinu minnħabba n-nuqqas ta’ saċerdoti.

Tul l-eżortazzjoni appostolika, Christifideles Laici, il-Papa Ġwanni Pawlu II jinsisti dwar ir-responsabiltà tal-lajċi fil-ħidma tal-Knisja. Imma wkoll fir-Redemptoris Missio huwa jsemmi r-responsabbiltà tal-lajċi f’din il-missjoni, li hija mpenn tal-poplu t’Alla kollu. Huwa jikteb dwar dawk il-lajċi li jsiru evanġelizzaturi, l-aktar bħala katekisti, imma jinsisti li biex jgħixu aħjar il-fidi tagħhom, huma l-insara lajċi kollha li għandhom joffru xi ftit mill-ħin tagħhom lill-Knisja. (RM 71-74)

Kulturali.
L-enċiklika Redemptoris Missio titkellem dwar dak li ssejjaħlu l-inkarnazzjoni tal-evanġelju fil-kulturi tal-popli. Dan ifisser li l-evanġelizzazzjoni ma tridx tkun biss immirata lejn individwi iżda lejn kulturi sħaħ. (RM 52)

Dan ma jgħoddx biss għal dawk il-popli li qatt ma ħaddnu l-evanġelju, iżda wkoll għal dawk li għalkemm huma tradizzjonalment insara, madankollu, bl-influwenza tal-sekulariżmu, anke l-istess drawwiet insara tagħhom, illum ġew paganizzati. Fejn seħħ dan, jew qiegħed iseħħ issa, huwa dmir ta’ dawk l-insara li għadhom iħaddnu t-twemmin tagħhom b’kunvinzjoni, li bil-kelma u bl-eżempju tal-ħajja tagħhom jinfluwenzaw il-kulturi ta’ madwarhom biex fihom jinkarna mill-ġdid l-evanġelju ta’ Ġesù Kristu.

Katekeżi.
Barra minn hekk irridu nifhmu li l-evangelizzazzjoni ġdida ma tinkludix biss it-tħabbir mill-ġdid tal-kelma, iżda hija proċess sħiħ ta’ kristjanizzazzjoni u għalhekk trid tkun imsieħba minn katekeżi kontinwa. Jgħidilna Ġwanni Pawlu II li t-tħabbira tal-evanġelju, biex tkun sħiħa, irid ikollha wkoll katekeżi ekklesjali u sagramentali. (RM 23)

Sfortunatament, f’pajjiżna din il-katekeżi hija spiss limitata għall-klassijiet tad-duttrina li jattendu t-tfal qabel jersqu għall-ewwel tqarbina jew għall-konfirmazzjoni. Xi għaqdiet reliġjużi joffru wkoll katekeżi limitata għall-membri tagħhom u f’ċerti każi din hija miftuħa wkoll għal oħrajn li m’humiex. Iżda l-obbligu ta’ programm tajjeb ta’ katekeżi huwa tal-parroċċa. U dan irid ikun maħsub biex jilħaq lil kulħadd, mit-tfal sal-anzjani. Naħseb li llum fil-parroċċi kollha ssib il-Kummissjoni Kateketika, iżda ma naħsibx li nkun żbaljat jekk ngħid li bosta minn dawn il-kummissjonijiet jipprovdu biss għall-klassijiet tad-duttrina tat-tfal.

Kontemplazzjoni.
Min-naħa tagħhom, dawk li jridu jwettqu fedelment din il-missjoni, għandhom jaħsbu fuq id-dmir li għandhom li jkollhom dik il-qdusija li jitlob minnhom id-don ta’ din il-vokazzjoni. Huma jridu kuljum jiġġeddu fl-ispirtu u jaġgornaw il-formazzjoni dottrinali u pastorali tagħhom. Huwa u jaqdi l-ħidma tiegħu, in-nisrani jeħtieġlu jkun bniedem kontemplattiv. Irid isib it-tweġiba għall-problemi tiegħu fid-dawl tal-Kelma ta’ Alla u fit-talb, kemm personali u kif ukoll komunitarju. (RM 91)

Kuraġġ.
F’intervista li ta f’Diċembru tal-2010, l-Isqof Rino Fisichella, President tal-Kunsill Pontifiċju għall-Evangelizzazzjoni Ġdida, qal li l-evanġelizzazzjoni ġdida ma ssirx għaliex qed ngħixu fi żminijiet ta’ kriżi.

Madankollu nafu li meta soċjetà tradizjonalment nisranija bħal tagħna tkun sekularizzata u tgħaddi minn esperjenza bħal ta’ eklissi ta’ Alla, allura għan-nisrani dan jista’ jkun ta’ skoraġġiment kbir.  Il-Papa Ġwanni Pawlu II kiteb fir-Redemptoris Missio, illi jekk nagħtu ħarsa lid-dinja tal-lum, naraw ħafna fatturi negattivi, li jistgħu jwasslu għall-pessimiżmu. Iżda dan hu bla sens għaliex aħna nemmnu f’Alla, il-Missier u Sidna, u fit-tjieba u l-ħniena tiegħu. Imbagħad f’nota qawwija ta’ ottimiżmu jkompli li llum Alla qiegħed iħejji rebbiegħa nisranija tassew tal-għaġeb, li tagħha ġa qegħdin naraw is-sebħ. (RM 86)

Fi ftit ġimgħat oħra fil-parroċċi Maltin jibdew isiru l-Assembleji Parrokkjali annwali. F’dawn il-jiem ukoll, kemm fid-djoċesi kif ukoll f’kull parroċċa suppost qiegħed jitħejja l-pjan pastorali li fuqu trid titfassal il-ħidma pastorali ta’ pajjiżna matul it-tliet snin li ġejjien. F’dan kollu, jista’ jkollna t-tentazzjoni kbira li nżommu l-istatus quo u nibqgħu għaddejjin bil-programm li dejjem imxejna fuqu tul l-aħħar għexieren ta’ snin.

L-alternattiva titlob minna impenn kbir u determinazzjoni sħiħa biex ilkoll flimkien inwieġbu għal din is-sejħa li qed tagħmlilna l-Knisja. Imma hija waħda li fi kliem il-Papa Ġwanni Pawlu II, (RM 91) twassal għas-sebħ ta’ żmien missjunarju ġdid, jum li għad ikun jiddi kollu frott. Qatt daqs illum ma kellha l-Knisja opportunitajiet u okkażjonijiet li twassal l-evanġelju lill-bnedmin u lill-popli. Basta aħna lkoll inwieġbu b’ġenerożita u qdusija kbira għall-sfidi u l-appelli ta’ żmienna.

Tista’ ssib l-Enċiklika Redemtoris Missio bil-Malti billi tikklikkja hawn… »

Aktar dokumenti u tagħrif dwar l-Evanġelizzazzjoni Ġdida. …»

“Flimkien mal-isqfijiet kollha se nfittxu nqanqlu organiżmu ġdid li jkun jista’ jaħdem għall-evanġelizzazzjoni ġdida. Kif jeżisti wieħed għall-katekeżi, ieħor għall-karità, l-istess għandu jsir wieħed għall-evanġelizzazzjoni ġdida.”  Dan qalu l-Arċisqof Rino Fisichella, President tal-Kunsill Pontifiċju għall-promozjoni  tal-evanġelizzazzjoni ġdida, f’intervista li ta lill-aġenzija tal-aħbarijiet kattoliċi, Zenit.

L-Arċisqof Fisichella qal li l-ewwel evanġelizzaturi huma l-Isqfijiet u għalhekk  wieħed mill-ħidmiet li l-Papa fdalna f’idejna hu eżattament dak li nagħmlu  kuntatt partikulari mal-konferenzi tal-isqfijiet propju biex jinħoloq dan l-organu.

Huwa qal li l-Evanġelizzazzjoni Ġdida …

• ma ssirx għax qed ngħixu fi żminijiet ta’ kriżi….
• tfisser li nġeddu fina l-ispirtu missjunarju li għandu jkollu kull nisrani għax teħtieġ missjunarji ġodda …
• ma ssirx billi noqogħdu madwar mejda biex nippjanaw …
• hija intuwizzjoni profetika li ġġegħelna naħsbu bis-serjetà fuq żminijietna …
• iġġegħelna nifhmu l-mard tas-sekolarizzazzjoni li welled din il-kundizzjoni …
• u naħsbu fuq x’qed iwassal il-bniedem tallum li ma jimpurtah xejn mill-verità …
• twassalna nuru li l-laqgħa u l-esperjenza t’Alla hija kundizzjoni meħtieġa biex il-bnedmin tallum jerġgħu jsibu tassew is-sens ta’ ħajjithom …
• hija d-dmir li inwasslu mill-ġdid il-Vanġelu. …
• tridna nibdlu l-mod kif nitkellmu, waqt li l-kontenut jibqa’ dejjem dak li hu.

Jekk naħsbu jew nimmaġinaw li l-Knisja hi biss dik li tiġi ppreżentata lilna minn xi mezzi ta’ komunikazzjoni tal-massa, joħroġ ċar li se jkollna dejjem dehra parzjali u mgħawġa. Imma l-Knisja mhijiex hekk. Il-Knisja hi ta’ kobor li tibdel in-nies billi twasslilhom u tkunilhom xiehda tal-Vanġelu.

Ara l-intervista kollha bil-Malti, li Monsinjur Fisichella ta liż-Zenit.  Ikklikkja hawn …>

Għeżież Ħbieb,

Grazzi tal-kliem sbieħ indirizzati lili miż-żgħażagħ li qed jirrappreżentaw il-ħames kontinenti.  U nsellem bi mħabba lilkom ilkoll miġbura hawn, żgħażagħ mill-Oċeanja, l-Afrika, l-Amerka, l-Asja u l-Ewropa; u wkoll lil dak li ma setgħux ikunu hawn.  Jien dejjem inżommkom ħafna f’qalbi u nitlob għalikom.  Alla tani l-grazzja li narakom u nismagħkom mill-qrib u, waqt li miġburin flimkien, nisimgħu kelmtu.

Fil-qari li għadu kif ixxandrilna, smajna silta mill-Evanġelju li tgħidilna dwar kif għandna nilqgħu il-kliem ta’ Ġesù u ngħixuh.  Hemm kliem li jservu biss biex iwaqqfuna u li jgħaddu bħal żiffa ħafifa; oħrajn, sa ċertu punt, jagħtuna tagħrif; il-kliem ta’ Ġesù, mill-banda l-oħra, għandhom jidħlu f’qalbna, jifirxu għeruqhom u jinbtu hemm tul ħajjitna kollha.  Jekk ma jiġrix hekk, dawn il-kliem jibqgħu vojta u jsiru bħal duħħan.  Dawn ma jwassluniex għandu. U hekk Kristu jibqa’ ‘l bogħod, bħal leħen ieħor qalb tant ilħna oħrajn madwarna li issa tant drajnihom.  Aktar minn hekk, l-Imgħallem li qed jitkellem, jgħallem mhux dak li tgħallem mingħand ħaddieħor, imma dak li hu fih innifsu, il-waħdieni li tabilħaqq jaf it-triq tal-bniedem lejn Alla, għax hu nnifsu fetaħha għalina, hu stess ħoloqha għalina biex nistgħu nilħqu l-ħajja awtentika, ħajja li dejjem jixraq li ngħixu, f’kull ċirkostanza, u li lanqas il-mewt ma tista’ teqridha.  L-Evanġelju jkompli jfiehem dan bix-xbieha li tqanqlek ta’ xi ħadd li jibni fuq il-blat, li jegħleb il-mewġa t’attakki kontrih, f’kuntrast ma’ ħaddieħor li jibni fuq ir-ramel – f’lok li jidher qisu l-ġenna – iżda li jċedi mal-ewwel żiffa riħ u jispiċċa ħerba waħda.

Għeżież żgħażagħ, isimgħu sewwa l-kliem tal-Mulej, biex ikunu għalikom “spirtu u ħajja” (Ġw 6, 63), għeruq li jsostnu l-eżistenza tagħkom, regola ta’ ħajja li tqabbilna ma’ Kristu għax fqar fl-ispirtu, għatxana għall-ġistizzja, mimlijin ħniena, safja f’qalbna, nies li nħobbu l-paċi.  Isimgħuh kuljum bla waqfien, kif nagħmlu lil dak il-ħabib li ma jqarraqx bina, dak li miegħu nixtiequ naqsmu t-triq tal-ħajja.  Tafu tajjeb li meta ma nsegwux lil Kristu li jmexxina, nintilfu f’toroq oħra, bħal meta nagħmlu dak li jfettlilna fl-għama u l-egoiżmu, jew nintilfu wara dawk il-proposti li jħajruna imma li huma qarrieqa u inkosistenti, u jħallu vojt u frustrazzjoni warajhom.

Approfittaw ruħkom  minn dawn il-jiem biex issiru tafu lil Kristu aħjar u  fittxu li,  b’għeruqkom fih,  l-entużjażmu u l-ferħ tagħkom, ix-xewqa tagħkom li timxu ‘l quddiem, li tilħqu l-ogħla qċaċet, saħansitra lil Alla, għandhom fihom ġejjieni fis-sod, għax il-milja tal-ħajja diġà tinsab fikom.  Ħallu dik il-ħajja tikber permezz tal-grazzja divina, b’qalb kbira u bla medjokrità u ħudu bis-serjetà l-għan tagħkom li tilħqu l-qdusija.  U quddiem id-dgħufijiet tagħna li kultant jegħlbuna, inserrħu rasna mill-ħniena t’Alla li dejjem lest biex jagħtina jdejh u joffrilna l-maħfra fis-Sagrament tal-Qrar.

Jekk tibnu fuq il-blat samm, mhux biss ħajjitkom tkun soda u stabbli, imma tgħinu wkoll biex tirriflettu d-dawl ta’ Kristu fuq iż-żgħażagħ tamparkom u fuq il-bnedmin kollha, b’hekk tkunu qed toffru alternattiva valida lil dawk kollha li ntelqu għax is-sisien tagħhom ma kinux sodi; lil dawk kollha li jikkuntentaw biss billi jimxu wara l-moda, jistrieħu fuq is-sodisfazzjon immedjat u jinsew il-ġustizzja vera, jew li jserrħu biss fuq dak li jaħsbu huma minflok li jfittxu l-verità bla tidwir.

Tabilħaqq, hawn ħafna li jagħmlu lilhom infushom allat u jemmnu li m’għandhom bżonn l-ebda għeruq jew sisien barra minnhom infushom.  Jiddeċiedu weħidhom x’inhu veru jew le, x’inhu tajjeb jew ħażin, x’inhu ġust jew qarrieqi, min għandu jgħix u min għandu jiġi ssagrifikat f’isem għażliet oħra; jintelqu fuq id-destin, bla ebda direzzjoni ċara, u jħallu lilhom infushom jiddependu fuq dak li jfettlilhom dak il-ħin.  Dawn it-tentazzjonijiet dejjem hemm qegħdin.  L-importanti hu li ma naqgħux għalihom għax, tabilħaqq, iwasslu għal ħwejjeġ tabilħaqq vojta, bħal ħajja bla skop u libertà mingħajr Alla.  Aħna, mill-banda l-oħra, nafu sew li konna maħluqa ħielsa, fuq ix-xbieha t’Alla, propju biex inkunu fuq quddiem nett fit-tfittxija għall-verità u t-tjubija, responsabbli għal dak li nagħmlu, mhux inwettqu bl-amment dak li jordnawlna, imma ħaddiema kreattivi msejħa li nkabbru u nsebbħu l-ħolqien.  Alla qed ifittex lil min lest jiddiskuti b’responsabbiltà, xi ħadd li jista’ jidħol fi djalogu miegħu u jħobbu.  Permezz ta’ Kristu nistgħu verament nirnexxu u, mibnija fih, nittajru ħielsa.  Mhux dan hu l-għan ewlieni tal-ferħ tagħna?   Mhuwiex dan il-blat samm li fuqu għandna nibnu ċ-ċiviltà tal-imħabba u l-ħajja, li għandha l-ħila tagħti l-laqta umana lil kull bniedem?

Għeżież ħbieb, kunu prudenti u għaqlin, ibnu ħajjitkom fuq is-sisien sodi li hu Kristu.  Dawn l-għaqal u l-prudenza jmexxu l-passi tagħkom, xejn ma jbeżżagħkom u l-paċi ssaltan f’qalbkom.  Hekk tkunu mberkin u ferħanin, u l-ferħ tagħkom jittieħed mill-oħrajn.  Jibdew jistaqsu dwar x’jista’ jkun is-sigriet ta’ ħajjitkom u jagħrfu li l-ġebla tax-xewk li fuqha tistrieħ il-ħajja kollha tagħkom hi l-persuna ta’ Kristu, il-ħabib tagħkom, ħukom u l-Mulej, l-Iben t’Alla magħmul bniedem, dak li jagħti tifsira lill-univers.  Hu miet għalina lkoll, u qam biex aħna jkollna l-ħajja, u issa, mit-tron tal-Missier, hu għadu ħaj u qrib tal-bnedmin kollha waqt li jħares lil kull wieħed u waħda minna.

Nafda l-frott ta’ dan il-Jum Dinji taż-Żgħażagħ lill-Imqaddsa Verġni Marija li qalet “iva” għar-rieda t’Alla, u tagħtina eżempju ewlieni tal-fedeltà lejn binha divin, li warajh imxiet sa mewtu fuq is-Salib.  Ejjew nimmeditaw aktar fil-fond dwar dan waqt kull stazzjon marul It-Triq tas-Salib.  U ejjew nitolbu biex bħalha l-”iva” tagħna lil Kristu llum tkun ukoll “iva” bla kundizzjonijiet għall-ħbiberija tiegħu, kemm fi tmiem din il-ġuranta u kemm tul ħajjitna kollha.  Grazzi ħafna.

Cuatro Vientos Air Base, Madrid  – Is-Sibt, 20 t’Awwissu 2011

 Għeżież Żgħażagħ,

Insellmilkom ilkoll, speċjalment liż-żgħażagħ li staqsewni l-mistoqsijiet tagħhom, u nirringrazzjahom tas-sinċerità li biha wasslu t-tħassib tagħhom, li juri x-xenqa li intom ilkoll għandkom li tagħmlu xi ħaġa kbira f’ħajjitkom, xi ħaġa li ġġibilkom il-milja tagħkom u ferħ.

Kif jista’ żagħżugħ jibqa’ fidil lejn il-fidi u xorta jissokta jaspira lejn ideali għolja fis-soċjetà ta’ llum?  L-Evanġelju li għadna kif smajna, jagħtina tweġiba għal din il-mistoqsija urġenti: “Kif ħabbni l-Missier, hekk ħabbejt lilkom; ibqgħu fl-imħabba tiegħi” (Ġw. 15, 9)

Iva, għeżież ħbieb, Alla jħobbna.  Din hi l-verità qawwija ta’ ħajjitna; hi dak li jagħti tifsira lil kull ħaġa oħra.  Aħna m’aħniex frott ta’ destin jew assurdità għomja; iżda ħajjitna issib l-għajn tagħha bħala partiminnpjan ta’ mħabba ta’ Alla.  Li nibqgħu f’imħabbtu, għalhekk, ifisser li ngħixu ħajja mxettla fil-fidi, ladarba l-fidi mhix biss li taċċetta xi veritajiet astratti: hi relazzjoni intima ma’ Kristu, li jagħtina l-ħila li niftħu qalbna għal dan il-misteru ta’ mħabba u ngħixu ta’ rġiel u nisa li jagħrfu li huma maħbubinminnAlla.

Jekk tibqgħu fl-imħabba ta’ Kristu, imxettla fil-fidi, intom se tiltaqgħu mal-għajn ta’ ferħ u sliem, ukoll qalb diżappunti u tbatija.  Il-Fidi ma tmurx kontra l-ideali għolja tagħkom; bil-maqlub, hi terfa’ ‘l fuq u tipperfezzjona dawk l-ideali.  Għeżież żgħażagħ, tikkuntentawx b’inqas mill-Verità u l-Imħabba, tikkuntentawx b’dak li hu inqas minn Kristu.

F’dawn iż-żminijiet, għalkemm il-kultura tar-relattiviżmu li taħkem fuq dak kollu li hawn madwarna, qatgħet qalbha mit-tfittxija għall-verità, ukoll jekk din hi l-ogħla aspirazzjoni tal-ispirtu tal-bniedem, għandna bżonn nitkellmu bil-kuraġġ u bl-umiltà dwar it-tifsira universali ta’ Kristu l-Feddej tal-umanità u l-għajn tat-tama f’ħajjitna.  Hu refa’ fuqu t-tbatijiet tagħna, hu midħla sew tal-misteru tat-tbatija tal-bniedem u juri lilu nnifsu, mimli mħabba, f’dawk li qed ibatu. Huma min-naħa tagħhom, magħqudin mal-passjoni ta’ Kristu, jaqsmu mill-qrib dil-ħidma tiegħu ta’ fidwa.  Aktar minn hekk, l-attenzjoni miftuħa li aħna nagħtu lill-morda u lill-minsija tibqa’ dejjem xhieda umli u ħelwa tal-ħniena t’Alla.

Għeżież ħbieb, tħallu l-ebda kuntrarju jxekkilkom.  Tibżgħux, la mid-dinja, la mill-ġejjieni, u lanqas min-nuqqas ta’ ħila tagħkom.  Il-Mulej ippermettielkom li tgħixu f’dan il-mument fl-istorja biex, bil-fidi tagħkom, ismu jibqa’ jidwi mad-dinja kollha.

Waqt din il-velja ta’ talb, inħeġġiġkom titolbu lil Alla jgħinkom tagħrfu s-sejħa tagħkom fis-soċjetà u fil-Knisja, u li żżommu sħiħ bil-ferħ u l-fedeltà f’dik is-sejħa.  Hi ħaġa sabiħa li niftħu qalbna għas-sejħa ta’ Kristu u li nimxu b’kuraġġ u b’qalb kbira tul it-triq li jsawwar għalina.

Il-Mulej isejjaħ lil ħafna għall-ħajja fiż-żwieġ, fejn raġel u mara, filwaqt li jsiru ġisem wieħed (ara Ġen 2, 24), isibu l-milja tagħhom f’ħajja mimlija fl-għaqda ta’ bejniethom.  Hi viżjoni li daqskemm hi sabiħa daqshekk ieħor titlob impenn.  Hu proġett ta’ mħabba tassew li kuljum tiġġedded u ssir aktar qawwija fil-qsim tal-ferħ u n-niket, imħabba issiġillata bl-għotja totali tagħna nfusna.  Għahekk, li tammetti l-ġmiel u t-tjubija taż-żwieġ hi li tagħraf li biss l-ambjent ta’ fedeltà li ma tinħalx, flimkien mad-dispożizzjoni għad-don tal-ħajja li ġej minn Alla, li jixirqu lill-kobor u d-dinjità tal-imħabba fiż-żwieġ.

Kristu jsejjaħ oħrajn li jimxu eqreb warajh fis-saċerdozju jew fil-ħajja kkonsagrata.  Mhux faċli ssib il-kliem biex tfisser il-ferħ li tħoss meta tkun taf li Ġesù jfittxek, jafdak, u b’leħnu, li ma tistax ma tagħrfux, jgħidlek ukoll: “Imxi warajja!” (ara Mk 2, 14).

Għeżież żgħażagħ, jekk tixtiequ tiskopru u tgħixu fedelment dak l-istat ta’ ħajja li għalih il-Mulej qed isejjaħ lil kull wieħed u waħda minnkom, tridu tibqgħu f’imħabbtu bħala l-ħbieb tiegħu.  U kif nistgħu nżommu sħiħa ħbiberija jekk mhux billi niltaqgħu ta’ spiss, nitkellmu, u nkunu flimkien fil-ġid u fid-deni?  Sta Tereża ta’ Ġesù kienet tgħid li t-talb hu biss “dik il-laqgħa bejn il-ħbieb, u li ta’ spiss inqattgħu ħin weħidna ma’ dak li nafu li jħobbna” (ara L-Awtobijografija, 8).

Mela issa nitlobkom li “tibqgħu” fl-adorazzjoni ta’ Kristu, li hu tassew preżenti fl-Ewkaristija.  Nitlobkom li tidħlu f’diskursata miegħu, biex iġġibulu quddiemu l-mistoqsijiet tagħkom u tisimgħu leħnu.  Għeżież ħbieb, nitlob għalikom b’qalbi kollha.  U nitlobkom biex titolbu għalija.  Illejla ejjew nitolbu lill-Mulej biex, miġbudin mill-ġmiel ta’ mħabbtu, nibqgħu dejjem fidili lejh bħala dixxipli tiegħi.  Ammen.

Għeżież ħbieb, nirringrazzjakom tal-ferħ u r-reżistenza tagħkom.  Il-qawwa tagħkom hi aqwa mix-xita.  Grazzi.  Max-xita, il-Mulej bgħatilna ħafna barkiet.  F’dan ukoll, intom tagħtu eżempju.

[Franċiż]  Għeżież żgħażagħ ta’ lsien Franċiż, kunu kburin bid-don tal-fidi li rċevejtu għaliex iddawlilkom ħajjitkom f’kull ħin. Isiltu l-qawwa mill-fidi ta’ dawk ta’ madwarkom, mill-fidi tal-Knisja!  Permezz tal-fidi aħna weqfin fi Kristu.  Inġabru flimkien biex issaħħuha, titilfux iċ-ċelebrazzjoni tal-Ewkaristija, l-aqwa misteru tal-fidi.  Kristu waħdu jista’ jwieġeb għall-aspirazzjonijiet tagħkom.  Ħallu lilkom infuskom tinħatfuminn Alla, biex tkunu intom li tagħtu ħajja ġdida lill-Knisja!

[Ingliż]  Għeżież żgħażagħ, f’dan il-ħin ta’ skiet quddiem is-Sagrament Imqaddes, ejjew nerfgħu moħħna u qalbna lejn Ġesù Kristu, is-Sid ta’ ħajjitna u tal-ġejjieni.  Jalla jxerred l-Ispirtu tiegħu fuqna u fuq il-Knisja kollha, biex inkunu torċa ta’ ħelsien, maħfra u paċi għad-dinja kollha.

[Ġermaniż]  Għeżież Insara żgħażagħ mill-pajjiżi ta’ lsien Ġermaniż!  Fil-fond ta’ qalbna aħna nixxenqu għal dak li hu kbir u sabiħ fil-ħajja.  Tħallux li x-xewqat u l-ħolm tagħkom jisfaxxa, iżda waqqfuhom fis-sod f’Ġesù Kristu.  Hu nnifsu hu s-sisien żguri, dak li lejh għandkom idduru, biex tibnu ħajjitkom.

[Taljan]  Indur issa lejn iż-żgħażagħ Taljani.  Għeżież ħbieb.  Din il-velja se tibqagħlkom esperjenza li ma tinsewha qatt f’ħajjitkom.  Ħudu ħsieb il-fjamma li Alla xegħel f’qalbkom illejla.  Tħalluha qatt tintefa’, ġedduha kuljum, aqsmuha maż-żgħażagħ tamparkom li qed jgħixu fid-dalma u li qed ifittxu dawl għal mat-triq.  Grazzi!  Niltaqgħu għada filgħodu!

[Portugiż]  Għeżież ħbieb tiegħi, nistieden lil kull wieħed u waħda minnkom li tidħlu fi djalogu personali ma’ Kristu, biex taqsmu miegħu dak li qed iħassibkom u fuq kollox tisimgħu leħnu.  Il-Mulej qiegħed hawn u qiegħed isejħilkom!  Ħbieb żgħażagħ, hi ħaġa sabiħa li nisimgħu ġewwa fina l-kelma ta’ Ġesù u nimxu fuq il-passi tiegħu.  Itolbu lill-Mulej jgħinkom tagħrfu s-sejħa tagħkom fil-ħajja u fil-Knisja, u biex iżżommu fiha bil-ferħ u l-fedeltà, għax tafu li qatt ma jħallikom jew iqarraq bikom!  Jibqa’ magħna sal-aħħar taż-żmien.

[Pollakk]   Għeżież ħbieb żgħażagħ mill-Polonja!  Din il-velja ta’ talb hi mimlija bil-preżenza ta’ Kristu.  Weqfin fi mħabbtu, ersqu lejh bil-fjamma tal-fidi tagħkom.  Jimlielkom qalbkom bil-ħajja tiegħu.  Ibnu ħajjitkom fuq Kristu u fuq l-Evanġelju tiegħu. Minn qalbi nberikkom ilkoll.

* * *

Għeżież ħbieb żgħażagħ,

Għexna avventura flimkien.  Imsaħħin bil-fidi tagħkom fi Kristu, intom irreżistejtu għax-xita.  Qabel inħallikom nixtiqilkom ilkoll il-lejl it-tajjeb.  Strieħu sew.  Nirringrazzjakom tas-sagrifiċċju li qed tagħmlu u m’għandix dubju li toffruh b’qalb kbira lill-Mulej.  Nerġgħu naraw lil xulxin għada, jekk Alla jrid, fiċ-ċelebrazzjoni tal-Ewkaristija.  Qed nistenniekom ilkoll.  Nirringrazzjakom tal-eżempju sabiħ li tajtu.  Bħalma ġara llejla, intom tistgħu, ma’ Kristu, tissaportu it-taqbid tal-ħajja.  Tinsewhiex din.  Nirringrazzjakom ilkoll.